As Xornadas de Ilustración Urbana regresan esta fin de semana a Santiago de Compostela cunha nova edición que aposta por poñer en valor o debuxo como ferramenta de coñecemento, observación e resistencia fronte á velocidade. Así o explicou a concelleira de Turismo, Míriam Louzao, na presentación celebrada no Pazo de Raxoi, na que tamén participaron o deputado provincial de Patrimonio, Xosé Penas, e a coordinadora das xornadas, Gemma Cesáreo.
Louzao destacou que o programa, integrado no encontro internacional Compostela Ilustrada, permite cada ano “ver como a xente se para a observar Compostela e a debuxala con calma”. A edil subliñou que a iniciativa “tece unha imaxe alternativa da cidade feita de pequenas historias e olladas atentas, construíndo unha memoria visual compartida de Compostela”.
A actividade desenvolverase os días 7 e 8 de novembro na Casa das Máquinas, cun acceso libre e gratuíto a todas as sesións. O venres abrirá coa inauguración oficial e coas conferencias das artistas Inma Serrano, Pascale Lee e Olivia Marcus, que achegarán as súas experiencias arredor do proceso creativo e do caderno de viaxe.
O sábado, o ilustrador Daniel Pagáns impartirá o obradoiro Partindo de Cero, pensado para persoas adultas sen experiencia previa no debuxo. Pola tarde, intervirán Ximena Maier, que falará sobre a ilustración en azulexos; Barnaba Salvador, cunha viaxe visual pola Vía Francíxena; e Sarah Mari Shaboyan, que abordará a busca dunha voz propia na arte gráfica.
O deputado provincial Xosé Penas salientou que a ilustración “permite visibilizar o noso entorno dunha forma máis pausada, analítica e diferente”, e valorou o traballo conxunto entre cultura e patrimonio “para ofrecer novas maneiras de mirar Compostela”.
Pola súa banda, Gemma Cesáreo puxo o acento no carácter participativo do proxecto e no seu crecente atractivo internacional. “Cada ano, cando chamamos para convidar artistas, a resposta é inmediata: Compostela é unha cita moi desexada”, asegurou. Nesta edición, avanzou, participarán preto de 140 persoas, cun programa “mayoritariamente feminino” e con creadoras procedentes de París, Toulouse e Italia.
As xornadas compleméntanse coas exposicións de ‘Mulleres en Compostela’ —no Centro Maruxa e Coralia— e ‘Camiños de Viaxe’ —no Museo das Peregrinacións—, ademais das sesións de debuxo en espazos emblemáticos como a Alameda, o Obradoiro, o Mercado de Abastos ou San Pedro.
“Debuxar é habitar con máis conciencia o espazo”, concluíu Louzao, quen convidou á cidadanía a “visitar Compostela con tempo e deixarse sorprender polos artistas que a reinterpretan con novos ollos”.
