A concellaría de Capital Cultural presentou as dúas últimas grandes citas de Compostela Cultura para este ano: Sumrrá despedirá a súa xira de 25º aniversario no Auditorio de Galicia o 29 de novembro ás 20:30, mentres que De Vacas celebrará dez anos de traxectoria no mesmo escenario o 28 de decembro ás 20:30 cun novo formato sinfónico. As entradas para ambos espectáculos están dispoñibles desde hoxe ás 12:00 na web de Compostela Cultura e na Zona C; se quedasen localidades, haberá venda no propio Auditorio o día de cada concerto.
A concelleira Míriam Louzao enmarcou os dous eventos no apoio municipal a proxectos creados en Santiago e consolidados no tempo. “Responden ao compromiso deste concello de acompañar e recoñecer proxectos que naceron na cidade, medraron co apoio do público galego e se fixeron referentes tamén fóra do país”, sinalou. Louzao destacou tamén o efecto de proxección cultural: “Queremos amosar esa Compostela sonora e diversa ás persoas que nos visitan, máis alá dos tópicos”.
No caso de Sumrrá, o trío formado por Manuel Gutiérrez, Xacobe Martínez Antelo e L.A.R. Legido porá o ramo a un cuarto de século de actividade coa presentación de Sumrrá Revolution, o seu oitavo disco. Será o derradeiro concerto da xira de aniversario. Ao longo da súa traxectoria, o grupo levou o jazz compostelán a festivais e escenarios de Canadá, Corea, Sudáfrica, México, Brasil, China ou Portugal. “Quixemos facer un disco que, a nivel compositivo e de posta en escena, é unha revolución para nós“, avanzou Xacobe Martínez Antelo, engadindo que a estrea en directo das novas pezas en Compostela constitúe “o primeiro ritual co público” deste traballo.
Un mes despois, De Vacas subirá ao Auditorio cunha proposta de carácter celebrativo: ‘Vacanal sinfónica’. As cantantes Paula Romero, Inés Salvado, Faia Díaz e o guitarrista Guillerme Fernández revisarán os grandes éxitos do grupo nun formato ampliado con coro e conxunto de cámara (cordas e ventos), con arranxos de Luca Rey e dirección de Ramón Bermejo. No elenco instrumental figuran, entre outras e outros, Helena Vázquez, Carmen Gallego, María José Pámpano, Macarena Montesinos, Benxamín Otero, Pablo Pascual, Claudia Carballo e Roberto Rama. “Acostumadas a un formato espido —tres voces e unha guitarra—, o 10º aniversario pedía vestir a escena e elevar o repertorio a un carácter sinfónico, cunha fantasía moi propia do universo do grupo”, explicou Paula Romero. A produción artística complétase co traballo escénico e de iluminación de Dúas e Punto (María e Carmen).
Durante a rolda, a xestora e violinista María José Pámpano subliñou o valor das dúas traxectorias para o ecosistema cultural local: “Son propostas de carreira de fondo que tecen un escenario profesional sólido do que Compostela pode estar orgullosa”. A organización confirmou que De Vacas contará con convidadas e convidados sorpresa, mentres que Sumrrá presentará unha posta en escena sobria deseñada xunto a Laura Iturralde, afastándose do patrón habitual de trío en concerto.
