O Auditorio do Museo do Pobo Galego acollerá mañá, ás 19:00, a estrea do documental Sempre en Galicia, voz e pensamento galeguista na emigración, dirixido por Xan Leira. A película rende homenaxe ao histórico programa radiofónico Sempre en Galicia, creado en 1950 no Río da Prata polo exilio galeguista e republicano, e que continúa emitíndose de forma ininterrompida setenta e cinco anos despois.
A través de imaxes de arquivo e entrevistas, o filme recupera a memoria dun espazo que se converteu nun símbolo de resistencia cultural e política, ao manter viva a lingua e a identidade galega entre a diáspora. Durante décadas, o programa foi o único espazo radiofónico en galego fóra das fronteiras do país, servindo de ponte emocional entre as comunidades emigradas e Galicia.
O documental, producido por Memoria Documental de Galicia S.L. coa colaboración da Xunta de Galicia e o Patronato de Cultura Galega de Montevideo, recolle os testemuños de Antonio ‘Toni’ de Seárez, Ana Lorenzo e Francis Queijo, actuais responsables do programa, así como do presidente do Patronato, José Piñeiro. Tamén participan Mónica Rebolo, autora de Bos días galegos, eiquí sempre en Galiza; Cristina Samuelle, autora de Conversas con Manuel Meilán, e antigos colaboradores como Lois Tobío Fernández, Xoán Martínez Castro, Yolanda Díaz Gallego, Manuel Suárez Suárez, José-María Monterroso Devesa, Carlos Sixirei Paredes e Fernando Novo.
A proxección insírese dentro das actividades conmemorativas polo 75 aniversario do programa ‘Sempre en Galicia’, unha das iniciativas máis duradeiras do galeguismo no exilio e un referente do pensamento e da cultura galega no exterior.
