A axenda cultural desta fin de semana en Compostela inclúe propostas para todos os gustos e idades: dende un festival poético de referencia ata concertos de música urbana, monólogos, actividades infantís e unha andaina temática polos espazos naturais do Gaiás. Un conxunto de citas repartidas entre o venres e o domingo que enchen a cidade de teatro, música, palabras e natureza.
-
Festas e Eventos
Alguén que respira 2025: Do xoves 20 ao sábado 22 de marzo, o Teatro Principal será o escenario da oitava edición do festival poético ‘Alguén que respira’. Durante tres días, o público poderá asistir a recitais, encontros e actividades arredor da poesía contemporánea, cunha programación centrada na diversidade lingüística e a poesía oral. O festival conta coa participación de poetas galegos e internacionais. Todas as actividades son de acceso libre ata completar aforo.
-
Música
Recycled J en concerto: O venres 21 e o sábado 22 de marzo, a Sala Capitol acollerá dúas actuacións consecutivas do artista madrileño Recycled J dentro da súa xira ‘San Jorge’. O concerto comezará ás 21:00 horas e forma parte da presentación do seu último traballo, no que combina sonoridades do trap, o pop e o reggaetón, con letras persoais e coidadas. As entradas poden adquirirse a través da plataforma See Tickets cun prezo xeral de 33 euros e estará permitida unicamente para maiores de 16 anos.
-
Teatro e Espectáculos
Iggy Rubín – ‘Xa choraredes’: O domingo 23 de marzo ás 20:00 horas, o cómico madrileño Iggy Rubín actuará no Riquela Club co seu monólogo ‘Xa choraredes’. O espectáculo propón un percorrido por anécdotas persoais, reflexións sarcásticas e situacións cotiás vistas desde a súa particular visión do humor. A duración do show é de aproximadamente 75 minutos. As entradas están dispoñibles en ataquilla.com a partir de 16,80 euros, gastos incluídos. A actividade está recomendada para maiores de 16 anos.
-
Infantil
Poemas encantados: O sábado 23 de marzo, ás 18:30 horas, a Biblioteca de Galicia acollerá a actividade ‘Poemas encantados’, unha proposta dirixida a público infantil a partir de 3 anos. O espectáculo combina narración oral, poesía, música e maxia para fomentar o interese pola lectura desde as primeiras idades. A actividade terá lugar na Sala Infantil da biblioteca e ten unha duración aproximada de 50 minutos. A entrada é gratuíta.
-
Deporte
Andaina de Primavera: O domingo 23 de marzo, ás 11:00 horas, celebrarase a Andaina de Primavera no Monte Gaiás. Esta actividade, organizada con motivo do Día Mundial da Auga e do Día Mundial dos Bosques, consiste nun percorrido interactivo e comentado polos espazos naturais do Monte Gaiás, incluíndo o Xardín Literario, o Bosque de Galicia e o Parque do Lago. A andaina, de 2 quilómetros e 120 minutos de duración, está dirixida a público maior de 8 anos. A inscrición é gratuíta e pode realizarse a través da páxina web da Cidade da Cultura.
