A Xunta de Galicia abre a convocatoria para unha nova edición do Encontro de Artistas Novos Cidade da Cultura, unha iniciativa que reunirá en agosto a 40 talentos emerxentes no ámbito da creación contemporánea. Os seleccionados terán a oportunidade de presentar os seus proxectos artísticos no Gaiás, establecer contacto con outros creadores e optar a unha residencia artística na Cidade da Cultura.
Segundo informou o Executivo galego, este encontro é xa unha das iniciativas máis asentadas no panorama da creación artística en España. Dende a súa primeira edición, arredor de 800 artistas participaron nesta experiencia, que na última convocatoria rexistrou máis de 220 candidaturas de todo o Estado.
Durante a estadía de catro días no Gaiás, os seleccionados poderán expoñer o seu traballo e compartir coñecementos con outros talentos procedentes de disciplinas como as artes plásticas, a fotografía, o audiovisual, o deseño téxtil, a performance ou a creación sonora.
REQUISITOS E PRAZOS DE SOLICITUDE
O encontro está aberto a estudantes e graduados en Belas Artes ou noutras ensinanzas artísticas, así como a profesionais con traxectoria acreditada no ámbito da creación. A idade principal de participación está entre os 18 e os 35 anos, aínda que 10 das 40 prazas están reservadas a artistas de máis de 35 anos que cumpran os mesmos requisitos.
As persoas interesadas en participar deben enviar a súa solicitude antes das 14:00 horas do venres 23 de maio, achegando a documentación requirida ao enderezo electrónico encontro.cdc@xunta.gal.
A edición de 2025 do Encontro de Artistas Novos celebrarase entre os días 24 e 28 de agosto na Cidade da Cultura de Galicia, consolidando unha vez máis este espazo como punto de referencia para a creación contemporánea.
