A Asociación de Escritoras e Escritores en Lingua Galega (AELG) celebrou este sábado en Santiago de Compostela un acto en memoria de Rosalía de Castro, coincidindo co 188º aniversario do seu nacemento. O evento tivo lugar no Panteón de Galegos Ilustres, na igrexa de Santo Domingo de Bonaval, e incluíu unha lectura de poemas da autora, unha ofrenda floral e intervencións institucionais.
O presidente da AELG, Cesáreo Sánchez, abriu o acto destacando a vixencia da figura de Rosalía e relacionando a súa obra coa actualidade, facendo referencia a cuestións como o conflito en Gaza ou a oposición ao proxecto industrial de Altri en Palas de Rei.
A continuación, a escritora Marga do Val leu o manifesto da asociación, no que se reivindicou “o dereito a vivir en galego” e se fixo un chamamento a defender o idioma e o medio ambiente: “Saúde para impedir a destrución da terra que queremos, do país do mil ríos, e para berrar forte: Altri, Non!”.
Entre os asistentes á homenaxe estiveron a alcaldesa de Santiago, Goretti Sanmartín, o histórico político Xosé Manuel Beiras, a presidenta do Consello da Cultura Galega, Rosario Álvarez, e a deputada do BNG Mercedes Queixas.
A conmemoración tamén contou con representacións musicais da Coral da Asociación Cultural e Musical Solfa, e culminou coa interpretación do himno galego.
FESTIVAL DE ROSALÍA
Paralelamente, a cidade acolle esta fin de semana a sétima edición do Festival de Rosalía, promovido pola Deputación da Coruña e o Concello de Santiago. A programación inclúe concertos, recitais, teatro e actividades culturais na praza de Mazarelos e noutros espazos da cidade.
A alcaldesa compostelá reivindicou a figura da poeta como “transgresora e vangardista” e asegurou que, de estar viva, “mobilizaríase pola lingua”.
Ademais, a Xunta de Galicia anunciou a coprodución dunha nova montaxe teatral sobre Rosalía, ‘Cartografía de ásperas ortigas’, que se estreará os días 27 e 28 de febreiro na localidade portuguesa de Castelo Branco, dentro das actividades conmemorativas do seu nacemento.
