Familia Caamagno é un grupo de rock en galego de Sigüeiro, unha vila preto de Compostela. Naceu da unión de cinco chavales no ano 2011, que a día de hoxe seguen a crear música e a encher concertos.
Manuel Caamagno é o seu cantante, pero a banda tamén está formada por Toni, o batería; Lano, o guitarrista; Francesco, guitarrista; e Jess, tamén guitarrista. Un grupo que, como di Manuel, “debe de haber pocos como nós que, despois de trece anos, seguimos a ser os mismo compoñentes”.
Os Caamagno son galegofalantes e “pensamos en galego”, polo que non dubidaron nin un momento en crear as súas cancións no idioma no que se senten máis cómodos e que os viu medrar. Pero realmente, detrás desa “resposta oficial, tamén cantamos en galego por unha posición política e ideolóxica. Non podemos cantar noutra lingua que non sexa o galego”. Ademais do uso da lingua, o grupo busca enviar unha mensaxe en cada canción. “Somos un grupo que ten unha parte de diversión moi grande, pero debaixo case sempre suxace unha idea. O que nos gusta moito son as mensaxes agridoces”.
Familia Caamagno viaxou a países como Holanda, o norte de Italia ou Bélxica para tocar en festivais como o ‘Emigración’, sempre con respostas moi positivas por parte do público. Pero Santiago é unha cidade que condiciona o seu traballo, como nos inicios, cando crearon unha canción titulada ‘Os de Santiago’. Nos días de concerto, senten unha acollida moi especial. O pasado outubro de 2023 estrearon en Compostela o seu último disco, ‘O mundo está derrotado’, na Sala Capitol, onde rozaron o sold out. Manuel insiste no cariño do público pero tamén bromea: “son os concertos aos que poden vir as nosas nais”. “Os concertos en Compostela teñen algo especial para nós”.
Familia Caamagno ve o panorama musical galego mellor ca nunca. “Vexo que hai moita xente facendo música, de diferentes estilos, e iso é unha marabilla”. A música mainstream chegou ao galego e “o mellor que lle pasou ao galego dende o ano 1983 foi esta eclosión de grupos que está habendo agora”.
Para Manuel, agora os músicos teñen que estar presentes e crear contido nas redes sociais. O circuíto de festivais mudou, e os programadores deciden a carteleira máis en función dos followers ca da calidade musical. “É un novo xeito de facelo, pero dende o meu punto de vista un xeito horrible”. A música agora móvese máis polo rédito económico.
“O mundo está derrotado” é un dos seus singles máis coñecidos e ten algo especial. Durante a gravación, Xaime Miranda propúxolles crear unha coreografía. Sen saber bailar, os integrantes do grupo inventaron un baile “cutre” que agora se converteu nunha conexión co seu público durante os concertos. A xente anímase e créase un ambiente moi especial durante a canción.
“Milagre económico” é o single que anuncia o seu próximo disco e segue a liña das mensaxes agridoces, falando da presión do turbocapitalismo, “da presión por gañar máis e por gastar máis”. É unha crítica política que “ten humor e comedia”.
Para os que veñen con ganas e ideas, Manuel di: “que sexan xenuínos, que as ideas orixinais son as que todo o mundo espera. E que ninguén se desanime, que hai xente que o peta con 50 anos”.
