A alcaldesa de Santiago de Compostela, Goretti Sanmartín, e o alcalde de Padrón, Anxo Rei, mantiveron esta mañá unha reunión institucional acompañados de cadros técnicos e membros dos seus gobernos para abordar cuestións compartidas que afectan a ambos concellos. A xuntanza, cualificada por ambos mandatarios como “a primeira de varias”, serviu para establecer un marco de colaboración sobre tres temas principais: o acceso á vivenda, a regulación dos pisos turísticos e a xestión da presión turística derivada do Camiño de Santiago.
Segundo explicou Sanmartín, no encontro compartiuse a experiencia de Compostela na implantación do imposto de estadías turísticas, xa aprobado definitivamente polo pleno municipal, así como no proceso de regulación dos pisos turísticos, iniciado en 2015 e culminado no presente mandato. Tamén se abordou a solicitude da capital galega para ser declarada zona de mercado residencial tensionado, trámite pendente de resposta por parte da Xunta de Galicia.
A rexedora compostelá destacou que tanto Santiago como Padrón teñen en común “unha presenza constante de poboación flotante” e a necesidade de buscar fórmulas de equilibrio entre turismo e dereito á vivenda. Apuntou ademais que a cidade está a estudar a posibilidade de implantar unha taxa para excursionistas de día e de desenvolver medidas para mobilizar vivenda baleira e promover vivenda protexida.
Pola súa banda, o alcalde de Padrón recoñeceu que o seu municipio non conta cos mesmos medios que Compostela, pero que aspira a aplicar criterios e regulamentos compartidos cos concellos que sofren unha presión turística similar. “Temos que ser capaces de xestionar o éxito turístico e garantir ao tempo a calidade de vida e a habitabilidade”, asegurou Rei, que anunciou a intención de encargar estudos sobre o mercado inmobiliario padronés para valorar futuras accións como a declaración de zona tensionada ou a regulación dos alugueiros turísticos.
Ambos dirixentes coincidiron en que a situación actual require políticas de longo alcance, alén das medidas urxentes do día a día. “Temos que deseñar estratexias con luces longas”, afirmou Sanmartín, quen subliñou que a liña de traballo común continuará agora a nivel técnico, coa colaboración entre os equipos municipais de ambos concellos.
OUTRAS CUESTIÓNS DE ACTUALIDADE
Durante a rolda de prensa, Sanmartín tamén respondeu a preguntas sobre outros asuntos de actualidade. En relación co debate arredor da descentralización dos estudos de Medicina, reiterou a posición institucional do Concello de Santiago a prol de que a Facultade de Medicina da USC sexa a única que imparta docencia básica, mentres que os cursos superiores poderían impartirse noutros lugares.
Preguntada sobre o balance do seu mandato, a alcaldesa destacou que a cidade está a ser “vanguarda” en múltiples políticas, desde a vivenda ata a recuperación das festas populares, e anunciou que tomará uns días de vacacións “necesarios” antes de retomar a actividade a finais de agosto.
En canto ao novo Parque Comarcal de Bombeiros, Sanmartín sinalou que o Concello está á espera de que a Deputación da Coruña valide a documentación entregada para poder avanzar na súa posta en marcha.
