O Milladoiro e Bertamiráns abriron as festas da Madalena e da Peregrina cun dobre pregón marcado polo compromiso coa diversidade social e a integración. A primeira cita do ‘Ames en Festas 2025’ tivo lugar no Milladoiro, onde catro mozos da asociación Arcea-Adames foron os encargados de dar o pregón de apertura. Martín Barreiro, Moncho Corral, José Manuel Fernández e Carlos Pais, veciños e usuarios desta entidade con sede no Milladoiro, foron os protagonistas dun discurso que puxo o foco no valor da veciñanza e da inclusión das persoas con discapacidade no tecido social e festivo local.
Durante a súa intervención, os pregoeiros reivindicaron o papel da súa asociación, que leva máis de dúas décadas traballando pola inclusión, e agradeceron a confianza da comisión de festas por darlle visibilidade ao seu traballo. “Fíxonos moita ilusión estar aquí con vós esta noite”, expresaron, facendo mención tamén a veciños, responsables municipais e persoas que lles acompañan no día a día, como os traballadores do restaurante ‘Ritrovo’, onde adoitan xantar.
O alcalde de Ames, Blas García, destacou a relevancia da escolla: “Era a mellor elección que se podía facer. Arcea-Adames é unha institución ligada por sempre ao Milladoiro e ao Concello de Ames”. Desde a comisión organizadora, Paula Segade agradeceu tamén o apoio de empresas, entidades colaboradoras e da Deputación da Coruña, subliñando o traballo feito con agarimo para que as festas sexan accesibles para toda a veciñanza.
O ton do pregón mesturou reivindicación e humor. Nun xogo de palabras co nome da patroa das festas, os pregoeiros aproveitaron para pedir que “a obra da nacional remate pronto e non chore como unha Madalena”.
Pola súa parte, a clausura das festas de Bertamiráns estará a cargo de Ronald Rojas, veciño de orixe venezolana. A súa escolla busca recoñecer a importancia da poboación migrante no concello. Segundo explicou Miriam Souto, membro da comisión de festas da Peregrina, trátase de dar visibilidade a unha realidade social presente no día a día do municipio: “Queremos que se sintan tamén parte do municipio nuns días nos que o sentimento de comunidade é tan importante”.
Coa escolla de pregoeiros diversos, o Concello de Ames reafirma o seu compromiso coa inclusión como eixo central das celebracións. Tanto o inicio como o peche do programa festivo serven así para visibilizar realidades sociais frecuentemente esquecidas, e convidar a toda a veciñanza a gozar das festas dende o respecto e a convivencia.
