O Museo do Pobo Galego propón para o mes de agosto unha variada programación centrada na memoria oral, os conflitos territoriais e a creación artística vinculada á identidade galega. Entre as actividades destacan as visitas comentadas á exposición ‘Cantareiras’, o faladoiro sobre a construción do territorio no noroeste peninsular e a Amazonía e a despedida da Bienal de Fotografía Etnográfica ‘Entre Amigos’.
A exposición Cantareiras. Oralidade. Creación. Transmisión, inaugurada en abril e comisariada por Isabel Vigo e Carme Campo, poderá visitarse até o 28 de setembro, mais o 22 de agosto ás 12:00 horas haberá unha visita guiada especial, pensada para público adulto. Nesta actividade gratuíta, as dúas técnicas do museo acompañarán ás persoas inscritas nun percorrido dialogado pola mostra, centrado no papel das mulleres como transmisoras da poesía oral e na evolución da tradición oral galega a través dos arquivos do museo. A inscrición debe realizarse enviando un correo a servizosdeac@museodopobo.gal, cun máximo de dúas persoas por solicitude.
No ámbito da reflexión contemporánea, o xoves 28 de agosto ás 19:00 horas, o auditorio do Museo de Bonaval acollerá o faladoiro Narrativas á volta da terra-territorio no noroeste peninsular e no centro da Amazonía, a cargo do antropólogo Diego Amoedo. A charla abordará o papel de elementos como o gando, os muros ou os cultivos na configuración simbólica e social do territorio, así como as tensións ambientais e as formas de narrar as fronteiras e a creación dos estados-nación desde as comunidades rurais. A actividade, de entrada libre, forma parte do ciclo Faladoiros en Bonaval, que terá continuidade ao longo do ano.
Ademais, o museo mantén abertas outras dúas exposicións temporais. Por unha banda, Espazos contra o baleiro, unha homenaxe a Isaac Díaz Pardo, que poderá visitarse até o 26 de outubro. A mostra explora o papel do artista e intelectual na refundación do Seminario de Estudos Galegos, o seu vínculo co Museo do Pobo Galego e o seu compromiso coa memoria histórica. No equipo curatorial participan Xosé Ramón Fandiño, María Xosé Fernández Cerviño e Pilar Sampedro.
Por outra banda, Entre Amigos, a XIII Bienal de Fotografía Etnográfica das socias e socios do Museo, entra nos seus derradeiros días, pois estará aberta só até o 24 de agosto. A edición deste ano dedica unha atención especial ao patrimonio inmaterial vinculado á música galega, con imaxes asinadas por Denís Estévez, José María Laredo Cordonié, José Francisco Méndez García, Jesús García Devesa, Nolo Suárez, Manuel Otero López e Lois Ladra, entre outras persoas participantes.
Tamén está dispoñible en liña, a través da canle de Youtube do museo, a peza audiovisual da exposición Cantareiras, un documento de 45 minutos de duración que recolle testemuños de cantareiras, investigadoras e músicas galegas. O vídeo ofrece unha visión coral da transmisión oral da música tradicional e da importancia dos arquivos sonoros como ferramenta de preservación da identidade cultural galega.
