Onte á noite no Auditorio de Galicia gozouse da novena edición da Gala aRi[t]mar Galiza-Portugal, unha celebración da música e a poesía galego-portuguesa, toda unha oda aos lazos culturais entre ambas nacións.
É unha iniciativa que naceu na Escola Oficial de Idiomas de Santiago de Compostela, pero que tamén acabou sendo acollida por outros centros de ensino que traballan co portugués ou co galego, e incluso aqueles que incorporan a música e a literatura neste ámbito lingüístico. As votacións realízanse cada ano en liña.
Premianse cinco categorías; dúas delas divídense segundo a lingua empregada no medio en cuestión, polo que dous premios son de poesía e dous de música. En ambos os ámbitos debe premiarse un en galego e outro en portugués. O quinto premio é especial, dedícase á embaixada da amizade galego-lusófona. Este premio si é escollido por un xurado e recíbeo aquela persoa, grupo, institución ou iniciativa que contribuíran a tender pontes de amizade e colaboración entre Galiza e a Lusofonía.
A edición deste ano contou con As Filhas Bravas de Momán como presentadoras: protagonistas dunha obra que trata sobre o empoderamento das mulleres que non é tan visible a simple vista na tradición galega, caracterizado por tres mulleres anciás do rural.
Botamos en falta a unha das integrantes na gala. Aínda así, deleitáronnos co seu característico humor, con momentos que pintaron a gala dun cor púrpura feminista e tamén de denuncia, xa que ao ter aRi[t]mar un carácter lingüístico, é imposíbel non mencionar o incumprimento do goberno actual na Lei de Normalización Lingüística e na Lei Paz Andrade.
A noite tamén contou coas actuacións musicais de Luiz Caracol, un artista alentejano-angolano; e De Ninghures, o grupo musical galego que puxo o broche de ouro á gala.
Finalmente, compartimos convosco os galardoados coa fermosa estatuíña de cerámica, na que se aprecian dúas gaivotas apertadas, foron:
- O premio á mellor poesía galega: Silvia Penas por ‘Canto segundo para un fillo non nado’. Durante o seu discurso, recitou tamén un poema titulado ‘Lisboa’, pertencente ao mesmo poemario que o poema galardoado, chamado ‘Retratos de vodas, partos e funerais’.
- O premio á mellor música portuguesa: Os Quatro e Meia por ‘Na escola’. Dos seis integrantes de Coimbra, acudiron tres deles para recibir o premio.
- O premio á mellor poesía portuguesa: Sílvia Mota por ‘Há mulheres que trazem…’. A poeta bracarense, moi emotiva, dedicou o premio a Rosalía de Castro, autora á que ten moita admiración, e a todas as mulleres.
- O premio á mellor música galega: De Ninghures por ‘Morena’. Os integrantes evocaron os seus inicios no seu discurso.
- O premio especial do xurado á embaixada da amizade galego-lusófona: A Sociedade Cultural e Deportiva do Condado, nada como organización no ámbito deportivo, convertiuse nun promotor de actividades culturais, como o Festival de Poesía do Condado, no que, dende o seu comezo en 1981, participan tanto poetas galegos como lusófonos. Ademais, engadiron no seu discurso a loita do pobo palestino e alzaron a súa voz para defender o medio ambiente galego co berro de ‘Altri NON’.
