A obra Soños, unha peza teatral pioneira en Galicia, aborda a situación da mocidade tutelada e estrearase mañá, mércores 30 de outubro, no Auditorio ABANCA de Santiago. Este espectáculo, dirixido especialmente á xuventude, combina humor e crítica social para achegar ao público a realidade destes mozos e mozas, amosando os seus desafíos, aspiracións e temores. Máis de 250 estudantes de 3º e 4º de ESO e de Bacharelato de Santiago, Vimianzo e A Estrada asistirán á representación.
A trama de Soños xorde do contacto directo do autor e a directora coa mocidade en vivendas tuteladas, coa intención de amosar a complexidade das súas vivencias. Ao finalizar a obra, unha educadora social de Igaxes compartirá unha reflexión co público sobre os estigmas sociais que afectan a este colectivo, e subliñará a importancia de ofrecer oportunidades antes de emitir xuízos preconceptuais. A través de exemplos, a intervención busca evidenciar o absurdo dos prexuízos que moitos destes mozos e mozas deben enfrontar diariamente.
Dentro da súa programación para escolares, a Obra Social de ABANCA Afundación promove as artes escénicas como unha ferramenta de educación en valores, sostibilidade e desenvolvemento de competencias sociais. Este curso escolar 2024-2025 contará con sete pezas escénicas orientadas a públicos desde infantil ata bacharelato, coa participación de 58.500 escolares de 466 centros educativos galegos.
