Gadis presentará este sábado, 26 de outubro, un libro que reúne os 95 microrrelatos finalistas e premiados da quinta edición do seu concurso, seleccionados entre máis de 2.000 textos participantes. Con tirada de 12.000 exemplares, o volume será distribuído de forma gratuíta ata fin de existencias nos seus puntos de venda en Galicia e Castela e León.
A través deste concurso, Gadis pretende animar á súa clientela a gozar da lectura mediante pequenas historias que capturan a atención en poucas palabras. Co tema ‘Os inicios’ como eixo central, os microrrelatos abordan situacións cotiás, fantásticas, humorísticas e realistas, mantendo a esencia de contar unha historia en menos de cen palabras.
Os exemplares imprentáronse en formato de peto, pensando na comodidade do lector, e tamén están dispoñibles en formato dixital, accesible para descargar en pdf a través da web gadismicrorrelatos.com. Con esta iniciativa, Gadis busca destacar a creatividade e dar voz a talentos anónimos, fomentando tanto a lectura como a escritura entre o público, que este ano bateu récord de participación.
Esta actividade, parte do compromiso cultural de Gadis, busca tamén apoiar o sector cultural e editorial. Ao longo do ano, a empresa ten distribuído máis de 70.000 exemplares con relatos breves e outros 360.000 libros con motivo do Día das Letras Galegas.
