A agrupación dos Socialistas de Ames celebrou a primeira das súas reunións executivas mensuais abertas á militancia, co obxectivo de avaliar a situación municipal e a xestión do Goberno local. A xuntanza marcou o inicio do curso político e centrouse na revisión das cuestións máis destacadas no Concello de Ames, ademais de acordar unha homenaxe ao histórico socialista Manolo Paz, que terá lugar o próximo 25 de outubro.
Un dos temas principais foi o apoio incondicional dos Socialistas á obra de humanización de Rosalía de Castro no Milladoiro, unha actuación valorada en 4,4 millóns de euros. Segundo o portavoz da executiva do PSdeG-PSOE de Ames, Víctor Fernández, a veciñanza debe saber que os Socialistas son “os únicos que demos a cara pola humanización”, en contraposición ao BNG, ESCO e PP, a quen acusou de “traizón” ao opoñerse á execución deste proxecto fundamental para a localidade.
Outra cuestión tratada foi a gratuidade da AP-9, que será abordada nunha moción presentada polo grupo de goberno no pleno municipal.
Ademais, a agrupación acordou organizar unha homenaxe ao socialista Manolo Paz, recoñecendo a súa longa traxectoria de dedicación, compromiso e lealdade á agrupación de Ames. O acto terá lugar o venres 25 de outubro e contará coa participación da militancia local e doutros representantes socialistas da contorna.
