O líder do PP de Santiago, Borja Verea, expresou hoxe a súa sorpresa pola nova reacción do BNG en relación á taxa turística anunciada o venres pasado. Segundo Verea, “tan só 48 horas tardaron en cambiar de opinión e poñerlle trabas á taxa turística”, un imposto que considera “tan esperado”. O popular acusou ao BNG de “inventar excusas” e de “non estar disposto a xestionar e traballar como é debido”.
En palabras de Verea, “agora que xa se pode aplicar a taxa, deberían estar a traballar para sacala adiante, e se non saben ou non queren, que se boten a un lado. Nós si que podemos e saberemos como facelo”, engadiu. O líder popular reiterou que, de ser el o alcalde de Santiago, desexaría “xestionar os impostos dos veciños” e ter plena competencia sobre o seu destino, criticando ao BNG por “buscar excusas” en lugar de traballar.
Verea tamén lembrou que o PP de Santiago nunca se opuxo á taxa turística, afirmando que o BNG utilizaba a súa postura favorable como “escudo contra a Xunta”. Agora, insta ao goberno local a traballar na súa implementación para principios de 2025, cando se habilitará o imposto, e suxeriu que comecen xa a preparar a súa aplicación.
Con respecto ao destino dos fondos recadados, o líder popular deixou claro que o PP non é partidario de integrar eses cartos no orzamento xeral. “Se de nós dependese, o recadado iría destinado a turismo sostible, programación cultural, limpeza e seguridade“, subliñou Verea.
