As traballadoras dun centro de ensinanzas artísticas situado en Santa Marta, Santiago de Compostela, iniciaron unha folga indefinida para esixir o respecto aos seus dereitos laborais e melloras nas súas condicións de traballo. Nun comunicado emitido ao final dunha concentración celebrada esta semana, a delegada sindical da CIG agradeceu o apoio recibido por parte do alumnado e das súas familias, subliñando que esta protesta responde tamén ás necesidades dos usuarios, que sofren unhas ratios excesivas e a ausencia dun plan de seguridade específico.
Entre as demandas principais das traballadoras figuran a readmisión dunha compañeira despedida cunha relación laboral de falsa autónoma, a equiparación salarial, o cumprimento do convenio laboral en aspectos como o calendario, rexistro horario e compensación de horas extras, así como a regularización das categorías profesionais e da antigüidade.
O comité de folga denunciou que, malia os varios meses de conflitos e intentos de negociación, a empresa só respondeu con desaires e falta de respecto. Aseguran que, a pesar dun achegamento verbal por parte dos responsables da empresa, as cuestións clave continúan sen resolverse.
NOVAS MOBILIZACIÓNS
Ademais de continuar coa folga indefinida, as traballadoras anunciaron máis accións de protesta. Este xoves, 12 de setembro, ás 17:00 horas, organizarán unha aula aberta reivindicativa fronte ao centro de traballo en Santa Marta, na que combinarán a ensinanza artística coa exposición da súa situación laboral. O martes, 17 de setembro, realizarán outra concentración ás 12:00 horas, seguida doutra aula aberta á tarde, ás 17:00 horas.
O comité destaca que, malia o esforzo económico que supón para o persoal, continuarán adiante coas súas reclamacións ata que se respecten os seus dereitos laborais.
