Os tres grupos municipais do Concello de Brión (PSOE, PP e BNG) aprobaron unha moción conxunta solicitando á Xunta de Galicia máis recursos humanos para o CEIP Pedrouzos. A iniciativa foi promovida polo grupo de Goberno, co obxectivo de expresar o apoio ás demandas realizadas pola dirección do colexio, a ANPA Andaravía e a Concellería de Educación de Brión ante a Consellería de Cultura, Educación, Formación Profesional e Universidades.
Entre as principais demandas está a cobertura da vacante do titor/a de Primaria con persoal a tempo completo, así como a incorporación dun mestre de Pedagoxía Terapéutica para atender tanto ao alumnado con Necesidades Específicas de Apoio Educativo como aos estudantes con Necesidades Educativas Especiais. Ademais, solicítase dividir o alumnado de 4º de Primaria en catro grupos, co fin de manter a ratio por debaixo dos 25 alumnos por clase.
Outro punto destacado é a petición dunha solución á provisionalidade do Departamento de Orientación, solicitando un segundo posto de orientador. Tamén se pide que a Consellería achegue o financiamento necesario para cubrir as necesidades do comedor escolar ou que facilite a contratación dos monitores necesarios.
A voceira do Grupo de Goberno, Sandy Cebral, reiterou o compromiso do Concello coa comunidade educativa de Brión, asegurando que “sempre estaremos a carón do colexio, dos pais e, sobre todo, dos nenos e nenas de Brión”. Afirmou que, se en algún momento faltara monitorado no comedor escolar, o Concello estaría disposto a asumir o gasto, tal como fixeron durante a pandemia.
Ademais, o pleno municipal tamén aprobou o pago das cotas provisionais á Mancomunidade Serra do Barbanza pola recollida de lixo, acordadas nunha reunión da xunta de alcaldes, ante a caducidade do contrato e a necesidade de prorrogar o servizo con FCC.
