Un equipo da Policía Nacional desprazarase a Ames o próximo 31 de outubro co obxectivo de facilitar a renovación ou expedición do Documento Nacional de Identidade (DNIe) á veciñanza. O servizo estará dispoñible no Pazo da Peregrina, en Bertamiráns, de 9:00 a 12:30 horas, con 75 citas asignadas por orde de solicitude.
As persoas interesadas deben reservar cita previa enviando un correo a gabinete@concellodeames.gal ou chamando ao 881 074 730, achegando o seu nome, apelidos e teléfono de contacto. Este servizo permite que a veciñanza de Ames poida renovar ou expedir o DNI sen necesidade de desprazarse a Santiago de Compostela.
O custo de renovación do DNI é de 12 euros, que deberán abonarse en metálico. Para expedir un novo DNI, será necesario presentar o volante de empadroamento e unha partida de nacemento literal. A entrega dos novos DNIs realizarase o 5 de novembro, e as persoas deberán acudir presencialmente a ambas fases do proceso.
