Este luns, 2 de setembro, deu comezo unha nova edición do Setembro Lúdico en Ames, que busca facilitar a conciliación das familias do municipio antes do inicio do curso escolar. O programa, que contará con 140 nenas e nenos inscritos, distribúese en tres centros educativos: o CEIP da Maía, con 66 participantes; a EEI do Milladoiro, con 33; e o CEP de Ventín, con 21.
As actividades organízanse en horario de 9:00 a 14:00 horas, con servizos ampliados para quen solicite o programa Bos Días, que comeza ás 7:30 horas, e o comedor, dispoñible ata as 16:00 horas. O programa, que se prolongará ata o 10 de setembro, céntrase este ano en descubrir os Obxectivos de Desenvolvemento Sostible (ODS) a través de xogos e actividades que levan aos nenos e nenas a “viaxar” por distintos países e explorar como cada rexión está traballando para acadar eses obxectivos.
Durante o programa, os pequenos estarán acompañados polas personaxes de Maruxa e Berenguela, que lles guiarán nunha aventura educativa centrada na sustentabilidade, igualdade de xénero e conservación ambiental. Este enfoque busca inspirar aos máis novos a ser axentes de cambio nas súas comunidades.
Ademais, este pasado 30 de agosto concluíu a Escola de Verán, que este ano contou con 1.082 inscricións, sumando a participación nas dúas quincenas dos meses de xullo e agosto.
