A alcaldesa de Santiago, Goretti Sanmartín, confirmou que seguen traballando nos estudos solicitados pola Xunta para declarar á capital galega como zona de aluguer tensionada.
Así o apuntou este xoves a preguntas dos medios de comunicación sobre este proceso e ante as críticas dos universitarios na procura de vivenda neste inicio do curso.
“Estamos a pór medidas para facer fronte a iso, pero tamén sabemos onde están a maior parte das competencias. A declaración de mercado tensionado, como xa dixemos máis dunha vez, a propia Xunta podería facela de maneira directa”, esgrimiu a rexedora compostelá.
Pero a Administración autonómica, continuou a rexedora, pide aos concellos diferentes estudos para, “mentres tanto, aprazar o problema”. “Nós estamos a facer eses estudos que se nos solicitan”, asegurou.
Doutra banda, Raxoi “tenta avanzar” en realizar un parque de vivendas que poidan ser alugadas a uns prezos módicos, pero iso será “un proceso longo”.
