O sábado 10 de agosto, a Aula da Natureza celebrou a Noite de Estrelas, unha actividade dedicada á astronomía que tivo lugar no alto de San Marcos. Esta iniciativa, destinada a todos os públicos, contou cunha notable participación, con máis de 50 asistentes que gozaron dunha noite de observación estelar.
Durante o evento, os participantes tiveron a oportunidade de explorar o ceo nocturno, aprender a identificar constelacións, galaxias e planetas como Venus, Saturno e Xúpiter. O astrónomo Antón Bouzas guiou as observacións e proporcionou información sobre diferentes aspectos da astronomía, desde a observación práctica ata a interpretación simbólica dos corpos celestes.
O concelleiro de Xestión do Medio Rural, Javier Antelo, expresou a súa satisfacción pola participación e destacou que “estamos moi satisfeitos coa ampla participación que está a ter esta iniciativa, e seguiremos impulsando este tipo de actividades para que toda a veciñanza poida participar”.
Antelo tamén recordou que durante o mes de agosto, a Aula da Natureza ten previstas dúas novas saídas. Estas actividades terán lugar o 16 de agosto no anfiteatro diante da igrexa do Milladoiro e o 17 de agosto no paseo fluvial de Bertamiráns.
