O escritor, profesor e investigador Xaquín María del Valle-Inclán Alsina faleceu este luns, 9 de novembro, aos 73 anos en Santiago de Compostela, a cidade na que naceu. A Asociación de Amigos de Valle-Inclán confirmou a súa morte nun comunicado no que expresou o seu pesar polo falecemento de quen presidiu a entidade entre 2013 e 2020.
A vida e a obra do seu avó, Ramón María del Valle-Inclán, ocuparon boa parte da súa actividade investigadora. En 2015 publicou en Espasa a biografía ‘Ramón del Valle-Inclán. Genial, antiguo y moderno’, na que documentou a traxectoria do dramaturgo. O actual presidente da asociación, José María Paz Gago, lembrou tamén as numerosas edicións de obras e os artigos que Xaquín del Valle-Inclán dedicou ao autor. A maior parte deses artigos apareceron en ‘Cuadrante’, revista especializada nos estudos sobre o dramaturgo.
Como narrador, debutou en 1988 con ‘Historias da cidade do deserto’, un libro experimental de estética neovangardista. En 1995 publicou ‘A praia de lastros’ xunto a Manuel Pérez Mahía. En 2002 saíron os seus relatos ‘As clases de maxia’ e ‘Os camiños do máis acá’.
UN RECORDO EN VILANOVA DE AROUSA
A Semana Cultural Valle-Inclán dedicará un recordo ao escritor este sábado, 14 de novembro, durante os actos na igrexa da Pastoriza, en Vilanova de Arousa. Ao anunciar a homenaxe, a Asociación de Amigos de Valle-Inclán destacou o seu traballo á fronte da entidade e o entusiasmo co que contribuíu a divulgar a figura do seu avó.
O conselleiro de Cultura, José López Campos, trasladou as súas condolencias á familia nunha mensaxe na rede social ‘X’, na que destacou que o investigador “destacou polo seu labor de divulgación da figura do seu avó”. Na mesma publicación, salientou a importancia de preservar e difundir o legado das persoas que contribuíron á cultura galega.
O alcalde de Vilanova de Arousa, Gonzalo Durán, trasladou tamén o pesar da localidade na que naceu o dramaturgo. O rexedor lembrou a Xaquín del Valle-Inclán como “unha gran persoa e colaborador na difusión do legado do dramaturgo”.
