A Real Academia Galega celebrará este domingo 17 de maio ás 12:00 no Teatro Principal de Santiago de Compostela o pleno extraordinario do Día das Letras Galegas 2026, dedicado á escritora e xornalista Begoña Caamaño. O acto, de entrada libre ata completar capacidade, converterá a capital galega no epicentro da principal celebración institucional da cultura galega, cun programa que combinará reflexión académica, memoria literaria e música.
A sesión contará coas intervencións de Ana Romaní, Marilar Aleixandre e Víctor F. Freixanes, que analizarán distintas dimensións da figura homenaxeada, mentres que o presidente da RAG, Henrique Monteagudo, será o encargado de clausurar o acto. A parte musical correrá a cargo de Sofía Espiñeira. A celebración, organizada co apoio do Concello de Santiago, a Xunta de Galicia e o Ministerio de Ciencia, Innovación e Universidades, poderá seguirse tamén en directo a través da web da Academia e da súa canle de Youtube.
A institución sitúa esta edición das Letras Galegas como unha reivindicación integral dunha autora cuxa traxectoria literaria, aínda breve pola súa morte prematura en 2014, deixou unha pegada destacada na literatura galega contemporánea. Caamaño publicou dúas novelas, Circe ou o pracer do azul (2009) e Morgana en Esmelle (2012), nas que reformulou mitos clásicos desde unha perspectiva feminista, tomando como punto de partida a Odisea e o ciclo artúrico. A RAG destaca nestas obras a súa capacidade para abordar cuestións como o amor, a liberdade, a morte ou os conflitos éticos e sociais, ao tempo que constrúe unha voz literaria propia.
Coincidindo coa celebración, o público asistente recibirá a edición conmemorativa Begoña Caamaño presenta Circe ou o pracer do azul e Morgana en Esmelle, un volume no que a propia autora reflexiona sobre os temas e inspiracións das súas novelas, e que tamén pode descargarse na web da Academia.
Pero o recoñecemento deste 17 de maio vai máis alá da creación literaria. A Academia subliña tamén o papel de Begoña Caamaño como xornalista, unha faceta marcada pola defensa da lingua galega e polo rigor profesional. Tras os seus inicios en emisoras de Vigo, desenvolveu boa parte da súa carreira na Radio Galega, onde desde 1992, xa instalada en Santiago, participou e dirixiu espazos como ‘Andando a Terra’, ‘Club Cultura’ ou ‘Expreso de Medianoite’, consolidándose como unha voz recoñecible no panorama mediático galego.
A programación das Letras Galegas arredor da autora completarase no outono cun simposio en Vigo, pero a RAG está a ampliar tamén a difusión da súa figura mediante novos formatos dixitais. Entre eles destacan o documental ‘Begoña Caamaño: navegar no pracer do azul’, a serie de reels ‘É o tempo de Begoña Caamaño’ e o videopódcast ‘Colchas de voces’, o primeiro deste tipo impulsado pola institución. Estas propostas buscan achegar o legado da autora a novos públicos, especialmente á mocidade, a través de formatos adaptados ás novas linguaxes audiovisuais.
No primeiro episodio de Colchas de voces participan Fillas de Cassandra, nun diálogo que conecta a reinterpretación feminista da mitoloxía clásica presente no proxecto musical co universo creativo de Caamaño. Deste xeito, a edición de 2026 das Letras Galegas proxecta a figura da autora non só como referencia literaria e xornalística, senón tamén como unha voz que continúa dialogando co presente cultural galego.
