UCIN Galicia fixo pública a súa crítica ao estado actual da obra de humanización da avenida Rosalía de Castro, no Milladoiro, cualificándoa de “escándalo político e administrativo” varios meses despois da súa recepción oficial por parte do Concello de Ames. A través do seu coordinador, José Luis Calo González, a formación sostén que a situación da principal arteria urbana do núcleo amesán evidencia importantes deficiencias pese a que o alcalde, Blas García, anunciara que o proxecto estaría rematado e recepcionado antes do 31 de decembro de 2025.
Segundo expón UCIN, a realidade que continúa afectando diariamente a veciñanza, comerciantes e persoas usuarias da zona é a dunha avenida na que seguen presentes obras correctivas, incidencias estruturais e problemas visibles que, ao seu xuízo, distan do que debería representar unha actuación pública de calidade financiada con fondos públicos. A formación considera “inconcebible” que unha intervención vinculada a un proxecto estratéxico de humanización da N-550 fose recepcionada administrativamente mentres continúan aparecendo novos defectos e se manteñen traballos de corrección.
José Luis Calo asegura que esta situación “supón un recoñecemento implícito de que a obra non estaba en condicións óptimas no momento da súa recepción administrativa”, ao tempo que advirte de que aceptar unha infraestrutura nestas circunstancias podería abrir a porta, segundo a súa valoración, a responsabilidades políticas, técnicas e administrativas.
Un dos principais aspectos nos que UCIN centra as súas críticas é a accesibilidade. A formación denuncia a existencia de barreiras arquitectónicas, desniveis e acabados deficientes en distintos puntos da avenida, asegurando que as solucións aplicadas non garanten unha mobilidade segura nin inclusiva para persoas maiores, persoas con mobilidade reducida ou familias con carros infantís. Neste contexto, sostén que unha obra destinada á humanización urbana debería priorizar precisamente a funcionalidade e a seguridade peonil.
Ademais, UCIN sinala tamén problemas relacionados coa reposición e canalización das augas, afirmando que a execución non resolveu adecuadamente este aspecto e que xa se están detectando incidencias visibles en diferentes zonas tras episodios de choiva. Para a formación, esta circunstancia engade novas dúbidas sobre a calidade técnica da actuación e sobre os mecanismos de control aplicados durante a súa execución e recepción.
“A cidadanía merece saber quen supervisou esta obra, quen asinou a súa recepción e quen vai asumir agora os custes das continuas reparacións”, afirma Calo, quen considera que non é admisible que unha obra pública de elevado investimento continúe xerando incidencias medio ano despois da súa suposta conclusión oficial.
No plano político, UCIN pregúntase se o goberno municipal socialista de Ames ten previsto esixir responsabilidades ás empresas adxudicatarias ou se, pola contra, permitirá que a situación continúe sen consecuencias. Neste sentido, a formación reclama un informe técnico independente sobre o estado real da obra, a publicación íntegra da acta de recepción, unha revisión completa das condicións de accesibilidade, a depuración de responsabilidades políticas e técnicas e a presentación dun calendario público e definitivo de reparacións.
Para José Luis Calo González, “un alcalde non pode recepcionar unha obra pública e meses despois seguir permitindo intervencións constantes, improvisación e deficiencias estruturais”, insistindo en que a responsabilidade institucional debe asumirse ante unha situación que, segundo UCIN, segue condicionando o día a día da veciñanza do Milladoiro.
