A Praza do Obradoiro acolleu este martes unha das citas máis concorridas do inicio das Festas da Ascensión cunha escoita colectiva exclusiva de O Cuarto, o novo traballo discográfico de Tanxugueiras, nun evento que reuniu a centos de persoas en Santiago antes da súa publicación oficial en plataformas dixitais.
A proposta, anunciada previamente polas artistas como unha experiencia diferente e non como un concerto ao uso, sorprendeu ao público cunha posta en escena marcada polo simbolismo. Durante máis dunha hora, Aida Tarrío, Olaia Maneiro e Sabela Maneiro permaneceron nun espazo escénico que recreaba un cuarto, realizando accións cotiás en silencio, como xogar ás cartas ou tender sabas, nunha representación vinculada ao universo conceptual do disco.
A actuación xerou inicialmente sorpresa entre parte das persoas asistentes, especialmente entre quen agardaba unha actuación musical convencional desde primeira hora da tarde. Foi pasadas as 21:00 cando a praza mudou de rexistro coa intervención das pandeireteiras AdeLina, que introduciron unha foliada colectiva antes de que se descubrira completamente o escenario e comezase a reprodución pública do álbum.
O acto converteu Compostela na primeira cidade en escoitar O Cuarto de maneira comunitaria, nun lanzamento que coincidiu ademais coa celebración dos dez anos de traxectoria do grupo. O novo proxecto presenta unha dimensión máis introspectiva e persoal, arredor de cuestións como a saúde mental, a identidade e a relación entre tradición e industria musical, mantendo a combinación entre música de raíz galega e sonoridades contemporáneas que caracteriza o grupo.
A presenza de AdeLina, única colaboración destacada do disco, reforzou tamén ese vínculo coa tradición oral e musical galega nunha noite na que o Obradoiro funcionou como escenario de celebración, reflexión e adianto exclusivo para o público compostelán e visitante.
