O Pleno municipal de Brión aprobou por unanimidade o V Plan para a Igualdade entre Homes e Mulleres (PIOM), un documento estratéxico que marcará as políticas municipais nesta materia entre os anos 2026 e 2030. O plan estará dispoñible en formato dixital na web do Concello e inclúe, entre outras medidas, un código de boas prácticas orientado a incorporar a perspectiva de xénero na actividade diaria da administración local.
O alcalde, Pablo Lago Sanmartín, destacou a participación cidadá durante o proceso de elaboración do documento, aberto á veciñanza. Segundo indicou, este período permitiu recoller propostas e inquedanzas coa finalidade de avanzar cara a “un concello máis seguro, libre e igualitario”. A partir destas achegas e do traballo desenvolvido polos Servizos Sociais municipais, realizouse unha diagnose da realidade local desde unha perspectiva de xénero, que serviu de base para establecer obxectivos dirixidos a eliminar discriminacións por razón de sexo.
O rexedor subliñou que o plan aposta por integrar de maneira transversal esta perspectiva na xestión municipal, co obxectivo de acadar unha igualdade efectiva no ámbito local.
A sesión plenaria desenvolveuse sen debate e con acordo unánime dos tres grupos municipais en todos os puntos tratados. Entre eles, aprobouse o inventario municipal a decembro de 2024, que alcanza os 48.346.282,89 euros, tras contabilizar as altas do último ano e descontar as baixas.
Tamén se deu luz verde a unha modificación do convenio co Concello de Ames para a organización do obradoiro dual de emprego ‘Renova Verde’. Ademais, o Pleno tomou coñecemento da renuncia de Teresa Avelina Andrade á súa acta como concelleira do BNG. A súa substitución será tramitada ante a Xunta Electoral Central e, segundo as listas electorais, correspondería a Marta Romero García.
Na mesma sesión, aprobáronse dúas declaracións institucionais, unha promovida pola Federación Española de Enfermidades Raras e outra pola FEGAMP, con motivo do Día das Letras Galegas 2026, dedicado a Begoña Caamaño.
SITUACIÓN NO IES DE BRIÓN
Na quenda de preguntas, o alcalde informou dun contacto recente co director territorial de Educación na Coruña, Santiago Freire, no que se lle trasladou que se está a tramitar a contratación da instalación de vinilos nas aulas do IES de Brión para reducir as altas temperaturas, unha demanda da comunidade educativa.
Segundo explicou, non se comunicaron aínda prazos concretos ao centro á espera de que a Consellería determine as datas de execución. Pola súa banda, a voceira do Goberno local, Sandy Cebral, reiterou o apoio do Concello ás demandas educativas e sinalou que a única solicitude formal rexistrada foi presentada pola ANPA Pedra Viada en xuño de 2025. Tamén indicou que esta cuestión foi trasladada á Consellería de Educación nas reunións mantidas polo alcalde co conselleiro competente.
