A concelleira do Grupo Municipal Socialista no Concello de Santiago, Marta Abal, cuestionou a xestión económica do Goberno local ao asegurar que os datos relativos ao período medio de pago a provedores evidencian un empeoramento nos indicadores de xestión municipal.
Segundo explicou a edil socialista, o Goberno municipal conta na actualidade coa estrutura directiva máis ampla da historia do Concello, unha circunstancia que, ao seu xuízo, non se está a traducir nunha mellora da administración municipal. Pola contra, Abal considera que os datos apuntan a unha evolución negativa.
Un dos indicadores que destacou foi o período medio de pago a provedores correspondente ao mes de decembro de 2025, que se situou en 60 días. Para a concelleira, este dato representa o peor rexistro dos últimos sete anos.
Abal comparou esta cifra con exercicios anteriores, lembrando que o prazo medio fora de 43 días en 2024, 22 días en 2021, 26 días en 2020 e 20 días en 2019. Na súa opinión, esta evolución confirma que a administración municipal é actualmente menos áxil no cumprimento das súas obrigas de pago.
A representante socialista subliñou que este incremento resulta especialmente significativo tendo en conta o reforzo da estrutura directiva municipal. Segundo indicou, “malia dispoñer de máis estrutura e máis cargos directivos ca nunca, o Concello é hoxe menos áxil e menos eficaz no cumprimento das súas obrigas de pago”.
AUMENTO DA DÉBEDA PENDENTE
A concelleira tamén alertou do incremento da débeda pendente do Concello, que a 31 de decembro de 2025 superaba en máis de tres millóns de euros a rexistrada no mesmo momento do ano anterior.
Ante esta situación, Abal indicou que o grupo socialista realizará un seguimento da evolución dos indicadores nos próximos meses. “Estaremos atentos á evolución dos datos no primeiro trimestre deste ano, pero a día de hoxe o balance é incontestable”, afirmou.
Para a edil, os datos dispoñibles amosan que a mellora na xestión municipal anunciada polo Goberno local non se está producindo, polo que considera necesario revisar o funcionamento da administración municipal e as medidas adoptadas polo executivo compostelán.
