Un estudo impulsado polo Centro Nacional de Investigacións Oncolóxicas (CNIO), con partipación do Instituto de Investigación Sanitaria de Santiago de Compostela (IDIS), vincula a fertilidade con células inmunitarias no cerebro.
Así o informa o IDIS tras a participación neste traballo da investigadora Miguel Servet do grupo de Fisiopatología Endocrina do IDIS e profesora asociada do departamento de Fisioloxía da Universidade de Santiago de Compostela (USC), Cintia Folgueira.
A investigadora participou nun traballo do Centro Nacional de Investigacións Oncolóxicas (CNIO) publicada este xoves pola revista Science, e que descubriu que células do sistema de defensa no cerebro participan no proceso de maduración sexual.
“O vínculo é RANK, unha proteína implicada en desenvolvemento mamario”. “O sinal para que comece a puberdade iníciase no cerebro, concretamente no hipotálamo, onde neuronas específicas liberan unha hormona que activa a hipófisis, na base do cranio, que á súa vez lanza outras hormonas que desencadean a maduración das gónadas (os ovarios ou os testículos)”, explican desde o IDIS.
“Este mecanismo, que culmina nun organismo fértil, é o eixo hipotálamo-hipófiso-gonadal”, engade. A investigación do CNIO con modelos animais descubriu que, neste sistema de regulación hormonal, “participan tamén dous elementos ata agora insospeitados: a microglía, que son células defensivas do sistema nervioso, e a proteína RANK, que contribúe á remodelación dos ósos e é esencial no funcionamento das glándulas mamarias”.
“Este traballo pon de manifesto que a regulación da fertilidade é aínda máis complexa do que pensabamos, identificar que células inmunitarias do cerebro, como a microglía, participan no control das neuronas que regulan a reprodución abre novas vías para entender como se inicia a puberdade e como se alteran estes procesos nalgunhas enfermidades”, explica Cintia Folgueira.
O estudo está dirixido por Eva González-Suárez, xefa do Grupo de Transformación e Metástasis do CNIO, quen descubriu en 2010 o papel crave de RANK no desenvolvemento do cancro de mama, e o primeiro autor é Alejandro Collado, investigador do mesmo grupo e tamén autor de correspondencia.
