O arcebispo de Santiago, Francisco José Prieto, fixo un chamamento este 25 de xullo a recoñecer a dignidade inviolable de toda persoa, con especial referencia a quen “chega de lonxe buscando un futuro” e a quen “pensa de maneira diferente”. Fíxoo durante a misa da Solemnidade do Apóstolo Santiago, celebrada na Catedral compostelá, na que o presidente do Parlamento de Galicia, Miguel Ángel Santalices, exerceu como delegado rexio na tradicional Ofrenda ao Apóstolo.
Na súa homilía, o arcebispo instou os fieis a non mirar as persoas “como un número, un problema, unha carga ou alguén útil ou inútil”, senón como “un irmán”. Neste sentido, subliñou a necesidade de protexer toda vida humana, especialmente a das persoas máis vulnerables, e defendeu que a responsabilidade colectiva pasa por coidar de quen se atopa en situación de maior fraxilidade.
Monseñor Prieto advertiu tamén dos riscos da polarización social e política. Ao seu xuízo, cando o adversario pasa a ser considerado un inimigo e as diferenzas se converten en “trincheiras irreconciliables”, detériorase a convivencia. Por iso, avogou por impulsar unha “verdadeira cultura do encontro”, baseada no diálogo, o respecto e no recoñecemento da dignidade de todas as persoas.
Así mesmo, reivindicou o respecto á liberdade de conciencia e relixiosa, lembrando que unha sociedade plural non debe temer a presenza pública da fe. O arcebispo asegurou que a Igrexa está chamada a contribuír ao ben común desde as súas conviccións, pero deixou claro que “a Igrexa non busca impor; quere propor, dialogar, servir e dar testemuño”.
SANTALICES RECLAMA UNIDADE POLÍTICA
O presidente do Parlamento de Galicia, Miguel Ángel Santalices, que exerceu como delegado rexio na tradicional Ofrenda ao Apóstolo, fixo un chamamento á unidade das forzas políticas para acadar un pacto sobre o galego e reclamou marcos legais que protexan os dereitos fundamentais fronte aos “totalitarismos tecnolóxicos”. Ademais, pediu ao rei Filipe VI que asista ao acto do Xacobeo 2027 e que interceda para que tamén participe o papa León XIV.
Durante a súa intervención, Santalices tamén apelou a reforzar a loita contra a corrupción mediante normas máis contundentes e institucións independentes, ao tempo que defendeu un sistema de financiamento “equilibrado e non discriminatorio”. Así mesmo, reivindicou o diálogo político, a defensa dos valores democráticos e o papel de Galicia e do Camiño de Santiago como exemplos de cooperación e compromiso constitucional.
