O Bloque Nacionalista Galego denunciou as deficiencias do transporte público que conecta o concello de Ames con Santiago de Compostela, especialmente entre os núcleos urbanos de Bertamiráns e O Milladoiro, tras unha visita realizada pola deputada autonómica Saleta Chao.
Durante o percorrido, Chao sinalou que non existe unha conexión axeitada entre os dous principais núcleos de poboación do municipio debido á falta de frecuencias. A situación agrávase, segundo explicou, no caso do Milladoiro, onde a presenza de estudantes aumentou no actual curso académico ao elixir este núcleo como lugar de residencia.
A deputada tamén advertiu de problemas co cumprimento dos horarios nocturnos publicados na web bus.gal, que conectan Ames coa capital galega. Segundo indicou, esta situación provoca que en numerosas ocasións a mocidade quede nas paradas sen servizo de transporte, ao non pasar os autobuses nas horas previstas.
A concelleira do BNG en Ames Escarlata Pampín alertou ademais das dificultades que afectan ás parroquias e zonas rurais do concello. Segundo afirmou, o actual deseño do transporte público provoca “unha clara discriminación por orixe”, xa que a mocidade que reside no rural non dispón das mesmas opcións de mobilidade que quen vive nas vilas ou nas cidades.
Entre os exemplos citados destacou a falta de transporte escolar para o alumnado que cursa estudos superiores, o que dificulta o acceso á formación. Pampín tamén denunciou incumprimentos nas liñas e nas paradas, impuntualidades e atrasos frecuentes, así como a insuficiencia de autobuses para cubrir a demanda existente.
A edil engadiu que as prazas dispoñibles nos vehículos resultan insuficientes en determinados horarios, e sinalou tamén deficiencias no estado de mantemento dalgúns autobuses, ademais da escaseza de información nas paradas sobre percorridos e horarios.
REIVINDICACIÓN DE MELLORAS NO PARLAMENTO GALEGO
Ante esta situación, Saleta Chao anunciou que o BNG volverá reclamar no Parlamento de Galicia melloras no servizo de transporte público, reclamando “liñas suficientes e estables, horarios útiles para estudar, traballar e vivir e un transporte digno no rural”.
A deputada concluíu sinalando que, ao seu xuízo, “o transporte público é un dereito, non un luxo”, polo que considerou necesario adaptar o sistema ás necesidades reais da poboación do concello de Ames e da súa contorna.
