O proceso de licitación do novo contrato do servizo de autobús urbano de Santiago queda novamente en marcha despois de que o Tribunal Administrativo de Contratación Pública de Galicia (Tacgal) comunicase o rexeitamento dos cinco recursos presentados por empresas do sector contra os pregos municipais.
A alcaldesa de Santiago, Goretti Sanmartín, informou este mércores da decisión do órgano autonómico a través dun audio remitido aos medios de comunicación. Segundo trasladou, “o Tacgal acábanos de comunicar o rexeitamento do cinco de recursos por empresas de transporte ao proceso de licitación. Ben por inadmisión ou por desestimación, o proceso continúa”.
A resolución supón que se levanta a paralización que afectaba á tramitación do contrato, que fora suspendida tras a admisión a trámite dos recursos e a imposición dunha medida cautelar. O Concello optara por deter tamén o prazo de presentación de ofertas “de forma prudente”, malia non estar obrigado legalmente a facelo, á espera da decisión definitiva do tribunal.
Coa comunicación do Tacgal, o executivo local poderá retomar o procedemento administrativo e reactivar o calendario para que as empresas interesadas presenten as súas propostas. O prazo inicial estaba fixado para o 9 de febreiro, aínda que polo momento non se fixeron públicos novos prazos tras a suspensión.
UN CONTRATO DE 128,5 MILLÓNS DE EUROS
O contrato do servizo de transporte urbano, cun orzamento estimado de 128,5 millóns de euros, foi presentado polo Goberno municipal o pasado mes de decembro. Trátase dunha das licitacións de maior contía económica do Concello, tanto polo volume do servizo como pola súa duración.
A rexedora xa sinalara anteriormente que a presentación de recursos en procedementos deste tipo é “habitual” en contratos de grande dimensión económica e técnica. Neste caso, as impugnacións afectaban aos pregos que regulan as condicións do servizo.
Entre as principais novidades previstas na nova concesión figuran a renovación da frota de autobuses, a actualización da aplicación móbil do servizo e unha modificación das tarifas, segundo o anunciado pola Administración local.
