A alcaldesa de Santiago, Goretti Sanmartín, presidiu unha reunión coa Federación de Asociacións de Rural de Santiago co obxectivo de trasladar os proxectos que o Concello prevé executar no rural compostelán ao longo do presente exercicio. No encontro participaron tamén a concelleira de Medio Rural, Pilar Lueiro, e o edil de Obras e Servizos Básicos, Xesús Domínguez.
Durante a xuntanza, o executivo municipal informou dos investimentos previstos para o ano 2026, que superan os 1,2 millóns de euros, aos que se suman outras intervencións actualmente en marcha nas distintas parroquias. Ademais da planificación económica, recolléronse achegas das asociacións veciñais relativas ás tarefas de mantemento ordinario previstas para a primavera e o verán, especialmente no referido a camiños, espazos públicos e servizos básicos.
Segundo trasladou o Goberno local, estas actuacións enmárcanse no cumprimento do Pacto polo Rural, co que o Concello reafirma a súa intención de reforzar a dotación de servizos nas parroquias. Entre as liñas de traballo salientadas figuran o incremento da oferta de actividades nos centros socioculturais, a mellora dos espazos das escolas infantís municipais e o impulso ao servizo de comedor para a poboación infantil do rural.
AMPLIACIÓN DA REDE DE ABASTECEMENTO EN MARANTES
No marco desta planificación, esta semana a concelleira de Medio Rural desprazouse á parroquia de Marantes para informar do inicio dunha das actuacións de maior contía. A reunión celebrouse o xoves 19 de febreiro ás 20:00 no local social da parroquia, coa presenza de persoal técnico municipal.
A intervención consistirá na ampliación de case catro quilómetros da rede de abastecemento de auga, o que permitirá conectar arredor de 70 vivendas, ademais de varias parcelas urbanizables. O orzamento supera os 800.000 euros e o prazo estimado de execución é de catro meses, co comezo das obras previsto nas próximas semanas.
Durante o encontro, Pilar Lueiro sinalou que “estamos perante unha das obras máis importantes do rural de Compostela destes anos cun importante orzamento”, en referencia á dimensión económica e ao alcance territorial do proxecto.
NOVO INVESTIMENTO EN CORTOS
A actuación en Marantes completarase con outra obra prevista na mesma parroquia: a construción dunha senda peonil no lugar de Cortos. Con esta intervención, o investimento total comprometido en Marantes ao longo de 2026 superará o millón de euros, segundo os datos trasladados polo executivo municipal.
O Concello sostén que estas actuacións buscan mellorar as infraestruturas e garantir a prestación de servizos básicos nas parroquias, nun contexto de reforzo das políticas específicas para o medio rural compostelán.
