Vale, si, semella que a Panorama vai tocar no Obradoiro durante as festas da Ascensión. Non serei eu quen vaia poñerse, tras anos movéndome nas súas antípodas culturais, a defender o modelo que representa ningunha orquestra, e moito menos esa, epítome do espectáculo vacuo, limitado, de luces e artificio, de forma sen fondo e cancións sosas e/ou rancias cunha selección que poderiamos calificar de símbolo evidente da colonización cultural española e anglosaxona fronte ao galego, tanto por quen fai coñecidas as cancións, como por lingua e, históricamente, incluso por estilos musicais dende os que se basean –isto igual hoxe non é tan marcado-.
Porén, é certo que é un modelo que interesa á poboación, ou polo menos a unha grande parte da poboación, e iso é do que vai unha programación dunhas festas. Máis aínda, tratándose dun evento organizado pola CRTVG, un ente que baixo a batuta do PP non deixa de representar e moverse xusto nese mesmo ambiente de masacre de pensamento crítico que debería representar a cultura no oxímoron industria cultural. O mesmo sitio no que están as orquestras, pero no seu caso a través dunha programación descerebradae un asasinato premeditado do galego e de calquera cousa que non favoreza ao statu quo. Cuestións estas que levan protestándose xa máis de 6 anos nos venres negros.
Partindo disto, creo que é preciso preguntarnos: a polémica de onde vén? de traela. Mais tamén hai que seguir preguntándose: de onde viría a polémica se non se trouxera? de non traela. Se isto o razonamos cando é a propia CRTVG quen organiza e pon a pasta, soa sospeitoso se non será que a polémica estivese xa preparada dende a propia idea da CRTVG de decidir ofrecela. Unha trampa sen resposta correcta, vida dende os despachos máis posicionados cara o antigaleguismo de San Caetano e San Marcos, que estaría perfectamente ideada como treboada para sinalar ao concello decidise o que decidise.
O bo: que se non facemos caso de polémicas innecesarias e miramos o resto da programación, vémola moi galega, moi conectada co que se fai dende Galiza na actualidade e que bebe do noso poñéndoo no mundo ao entender o país na realidade actual para todo tipo de públicos. De Fillas de Cassandra a Lontreira, de Dios Ke Te Crew a, xa dende fóra, Billie Marten. Iso sumado aos cantos de taberna, ás actuacións de agrupacións folclóricas, á competición de drons -cousa non moi tradicional, pero si interesante-, a rueiros, pasarrúas, monicreques… Non sei, a min paréceme que se algo non se lle pode achacar a este programa é que falten cousas para facer e eventos aos que asistir para case toda persoa que queira desfrutar no canto de ir malmeter vaia un saber por que intereses ‘orquestrados’.
