A alcaldesa de Santiago, Goretti Sanmartín, informou este venres da convocatoria do que será o segundo Debate do Estado do Municipio deste mandato para o próximo 12 de febreiro ás 12:00 horas. A rexedora, que reivindicou o valor do debate para “apostar pola participación cidadá” máis aló das reunións cos veciños, definiu a iniciativa como “unha forma produtiva de contrastar ideas, de facer balance do acontecido e de fixar retos de futuro”.
Nunha rolda de prensa posterior, o edil non adscrito Gonzalo Muíños manifestou a súa “sorpresa” ante esta convocatoria anunciada pola alcaldesa despois de que os non adscritos presentasen “o luns 19 unha proposición reclamando a convocatoria” do debate co obxectivo de que o goberno local “avaliase de forma global a situación do concello”. “Que casualidade que o luns 19 realicemos a proposición e hoxe, venres 23 ás 11:15 horas, a alcaldesa chámeme para comunicarme a súa convocatoria. Sorpréndeme que no contexto no que estamos a alcaldesa convoque xusto agora o Debate para o Estado do Municipio”, asegurou.
Así mesmo, Muíños fixou os “radares con fin recadatorio” como unha liña vermella ao posible apoio das non adscritas aos orzamentos do goberno local. O edil, aínda que recoñeceu ter “boa predisposición para negociar”, advertiu que non van votar a favor duns orzamentos “irreais e ficticios que non se van executar”. A pesar diso, admitiu que “as cousas poderían ir a peor se non hai presupostos aínda que sexa tarde”.
UN PLENO COMO “ANTESALA DOS ORZAMENTOS”
As non adscritas tamén planificaron o primeiro pleno do ano, a celebrarse o vindeiro xoves, como unha “antesala á negociación dos orzamentos” na que “pedirán explicacións” sobre a execución real do investimento no rural ou a xustificación do atraso das obras da Casa das Persoas Maiores, entre outros aspectos.
A edila Mercedes Rosón, á súa vez, asegurou que preguntarán sobre as reformas “comprometidas no acordo de 2025” dos parques infantís de Angrois, o da rúa Manuel Beirás en Conxo e a cuberta do da rúa Lisboa en Fontiñas. Así as cousas, Rosón comprometeuse a consultar ao goberno local no próximo pleno pola “implementación dun programa estable de actividades para o desafío da saúde mental e as incongruencias na xestión do ciclo da auga”.
“Preguntaremos por todo isto co obxectivo de que o goberno local dea explicacións públicas polos incumprimentos dos acordos plenarios. Non pode ser que cada ano cheguemos a acordos para os orzamentos nos que aparezan puntos repetidos”, resolveu.
