Dous accidentes múltiples rexistrados na área de Santiago de Compostela á primeira hora deste venres saldáronse con varias persoas feridas, nunha mañá marcada por unha granizada intensa que afectou á capital galega e á súa contorna. Os sinistros producíronse arredor das 08:30, coincidindo co empeoramento repentino das condicións meteorolóxicas.
Segundo informaron fontes do 112, un dos accidentes tivo lugar no quilómetro 69 da AP-9, en sentido A Coruña, onde se viron implicados catro turismos e un camión. Como consecuencia do impacto, tres persoas resultaron feridas, dúas delas condutoras, que tiveron que ser excarceradas polos bombeiros debido á gravidade do sinistro. Ata o lugar desprazáronse efectivos de Urxencias Sanitarias, bombeiros, Tráfico e servizos de mantemento da autoestrada para atender ás vítimas e restablecer a circulación.
De maneira case simultánea, ás 08:30, produciuse outro accidente múltiple na AG-6, no quilómetro 6, á altura de Ortoño, no concello de Ames. Neste caso, estiveron implicados catro vehículos, e catro persoas tiveron que ser trasladadas ao Complexo Hospitalario Universitario de Santiago para a súa avaliación médica.
Desde a Garda Civil da Coruña advertiron de que o episodio de meteoroloxía adversa está a provocar un regueiro de sinistros nas principais vías rápidas da provincia. En concreto, indicaron que na AG-56 se contabilizaron tres accidentes, ademais doutros rexistrados na AP-9 ao longo da mañá.
Ante esta situación, os efectivos de Tráfico realizaron un chamamento á prudencia, solicitando aos condutores adaptar a velocidade ás condicións das vías e seguir en todo momento as recomendacións dos servizos de emerxencias, especialmente en episodios de choiva intensa ou granizada que reducen de forma significativa a adherencia e a visibilidade.
