A formación política UCIN Galicia fixo pública este mércores unha valoración crítica sobre a situación política e administrativa do Concello de Ames, que cualifica de previsíbel e advertida desde hai anos. Segundo trasladou a organización, as dificultades que agora saen á luz responden a unha maneira de gobernar que, ao seu xuízo, priorizou a comunicación e os eventos fronte á planificación e ao control da xestión pública.
Nun comunicado, o coordinador de UCIN Galicia, José Luis Calo, asegurou que mentres o alcalde de Ames, Blas García, centraba a súa acción en actividades lúdicas e culturais, a formación viña alertando de problemas estruturais na administración municipal. Entre eles, mencionan actuacións urbanísticas mal planificadas, obras sen rematar e un recurso continuado aos contratos menores como ferramenta habitual de xestión.
A nota sinala de maneira específica a actuación na avenida Rosalía de Castro, no núcleo de O Milladoiro, que UCIN Galicia considera un exemplo representativo destas deficiencias. Segundo a formación, trátase dunha obra que desde o inicio xerou críticas pola súa execución e pola falta de planificación e seguimento, e que continúa a provocar molestias á veciñanza e problemas no uso diario do espazo público.
“Non é unha sorpresa o que está ocorrendo. É o resultado dunha forma de gobernar baseada na propaganda, na festa permanente e na ausencia de rigor na xestión pública”, afirmou José Luis Calo, quen lembrou que estas cuestións foron trasladadas ao longo do tempo tanto aos plenos municipais como aos medios de comunicación, sen que, segundo indica, se producisen correccións por parte do goberno local.
UCIN Galicia puxo tamén o foco no uso reiterado dos contratos menores, unha práctica que, segundo o seu coordinador, “serve para evitar a concorrencia pública, fragmentar o gasto e esquivar os controis legais”, o que ao seu entender afecta á transparencia e á confianza da cidadanía na administración local.
Ante esta situación, a formación reclama explicacións inmediatas por parte do alcalde, a realización dunha auditoría das obras da avenida Rosalía de Castro, unha revisión exhaustiva dos contratos menores e un cambio no modelo de goberno municipal. “Ames non necesita máis festas para tapar problemas, necesita xestión, transparencia e respecto polos cartos públicos”, concluíu Calo.
