O Concello de Ames acolle desde mañá, día 3, e ata o próximo luns 5 de xaneiro a Gran Festa de Reis, unha das citas centrais da programación de Nadal municipal, activa desde o acendido das luces a comezos de decembro. Durante estes días, a infancia do municipio poderá participar nas recepcións reais, asistir ás cabalgatas en Bertamiráns e no Milladoiro e gozar da Gran Festa de Reis, que incluirá chocolate, rosca e animación musical.
A programación arrinca o sábado 3 e o domingo 4 de xaneiro cos encontros cos Reis Magos nos pavillóns municipais de Bertamiráns e do Milladoiro. As recepcións desenvolveranse en dobre quenda, de 11:00 a 13:30 e de 17:00 a 19:30, ambos días e en ambos núcleos. Para participar é preciso inscribirse previamente mediante cita a través da Sede electrónica do Concello, cun prazo aberto ata hoxe, venres 2 de xaneiro ás 14:00. O sistema de organización prevé catro visitas simultáneas cada cinco minutos para facilitar a participación das familias.
O luns 5 de xaneiro pola mañá, os Reis Magos realizarán un percorrido polas parroquias do concello. A visita comezará ás 10:00 en Ameixenda e Cruxeiras e continuará por Augapesada (10:30), Piñeiro e Covas (11:00), Tapia e Ortoño (11:30), Lens (12:00), Agrón e Bugallido (12:30), Trasmonte (13:00) e Biduído (13:30), onde se porá o punto final á rolda matinal.
Xa pola tarde, terán lugar as cabalgatas de Reis. No Milladoiro, o desfile comezará ás 17:00, con saída da Igrexa e paso polas rúas Agriños, Travesía do Porto, Agro do Medio, Agro da Magdalena e Cereixos. Ao remate, arredor das 18:00, as Súas Maxestades trasladaranse ao pavillón municipal para a Gran Festa de Reis, na que se ofrecerá chocolate e rosca, tamén con opción sen glute, ademais de actuacións musicais e sesión de DJ.
En Bertamiráns, a cabalgata iniciarase ás 19:00 desde a nave de Obras, en Lapido, e percorrerá a Avenida da Maía, a Travesía Pedregal, a rúa Pedregal e a Avenida da Peregrina. A chegada ao pavillón municipal está prevista arredor das 20:00, onde se celebrará unha segunda Gran Festa de Reis co mesmo formato festivo.
Unha parte significativa dos caramelos que se repartirán durante as cabalgatas procederá do comercio Milladoiro Center Paloma, situado na rúa Pardiñeiros 13, que achegou 50 quilos de lambetadas sen glute destinadas ao Tren de Nadal e ás propias festas e desfiles de Reis.
Tras a Gran Festa de Reis, a programación de Nadal entra na súa recta final con dúas propostas musicais. O venres 9 de xaneiro, ás 20:00, a Casa da Cultura do Milladoiro Anxo Gómez acollerá un concerto do violinista amesán recentemente galardoado co premio extraordinario en ensinanzas artísticas profesionais de música, que actuará xunto á pianista Haruna Takebe. Ao día seguinte, o sábado 10, ás 19:00, o mesmo espazo será escenario do Concerto de Reis co que as agrupacións corais de Ames porán o peche definitivo ao Nadal. Para ambas actuacións será necesario retirar convite gratuíto a través da Billeteira electrónica do Concello.
