XUSTIZA E COLABORACIÓN FORENSE
A Xunta renovou a colaboración entre o Instituto de Medicina Legal de Galicia (Imelga) e o Instituto de Ciencias Forenses Luís Concheiro, cun orzamento que alcanzará os 400.000 euros para o próximo ano. O acordo garante a realización de probas de toxicoloxía, xenética forense (investigación de paternidade e xenética criminal) e análises de alcoholemia solicitadas polas autoridades xudiciais ou médicos forenses.
INVESTIGACIÓN E LINGUA GALEGA
O Consello achegará 754.000 euros para seguir impulsando a colaboración das tres universidades galegas no programa de investigación lingüística do Centro Ramón Piñeiro (período 2026-2029). Os proxectos céntranse na terminoloxía científico-técnica e literatura (USC), novas tecnoloxías (UVigo) e o dicionario histórico etimolóxico (UDC).Ademais, destinaranse máis de 120.000 euros para fortalecer a proxección exterior da lingua galega coas universidades Sorbona (París) e São Paulo (Brasil), financiando a dotación de lectores de lingua, literatura e cultura galegas.
EXTINCIÓN DO INGO
O Executivo galego aprobou o decreto de extinción da Fundación Pública Instituto Galego de Oftalmoloxía (Ingo). O persoal e as actividades da fundación integraranse na área sanitaria de Santiago de Compostela e Barbanza.
