Un incendio nunha habitación dun piso no centro de Santiago, na rúa Carreira do Conde, obrigou á primeira hora da tarde deste mércores a mobilizar aos servizos de emerxencias.
En concreto, segundo detallaron fontes do 112, o incendio orixinouse nunha cadeira de brazos no interior dunha habitación dun inmoble situado no número 2 da rúa Carreira do Conde.
Foi un particular quen, sobre as 16:20 horas, alertaba ao 112, que deu aviso aos Bombeiros de Santiago, á Policía Nacional e á Policía Local.
Así mesmo, estas mesmas fontes sinalaron que non hai persoas feridas e que os servizos de extinción traballan no punto.
