Un equipo científico no que participou persoal investigador da Universidade de Santiago de Compostela (USC) e do Instituto Español de Oceanografía (IEO-CSIC) documentou por primeira vez a presenza e a orixe de diversos contaminantes nos chans das colonias de pingüíns da Antártida.
O traballo, desenvolvido en illas Livingston e Decepción, identificou un “enriquecemento significativo” en nutrientes e en metais como cobre e zinc, así como en hidrocarburos aromáticos policíclicos (PAHs), segundo explicou a USC nun comunicado. Estes resultados apuntan a que as colonias de aves mariñas funcionan como vectores biolóxicos capaces de transportar e concentrar contaminantes, nun ecosistema teoricamente illado da influencia humana.
A investigadora do Centro Oceanográfico de Vigo do IEO-CSIC e primeira autora do estudo, Begoña Pérez, advertiu de que, aínda que os chans “parecen soportar estes niveis sen efectos inmediatos, de filtrarse cara a regatos ou augas costeiras, poderían afectar a organismos acuáticos extremadamente sensibles, como o placton, base da cadea alimentaria mariña”.
O equipo científico atribúe a presenza destes contaminantes a tres fontes principais: a propia actividade biolóxica dos pingüíns, a influencia volcánica da Illa Decepción e, en menor medida, a acción humana derivada das bases científicas e do turismo.
“Os pingüíns son esenciais para o equilibrio da vida na Antártida, pero tamén se poden converter nunha fonte natural de contaminación nun ambiente extremadamente fráxil”, indicou o catedrático da USC e coordinador do proxecto, X. L. Otero.
Aínda que as concentracións rexistradas non acadan niveis de alarma —situándose entre 50 e 1000 veces por debaixo das que xeran efectos tóxicos nos organismos mariños—, a investigación desmonta a idea de que a Antártida é un espazo completamente inalterado, subliñou Pérez. O estudo, publicado en revista científica internacional, reforza a necesidade de continuar monitorizando a influencia dos ecosistemas biolóxicos na dispersión global de contaminantes.
