A Xuntanza de Empresarios de Ames (XEA) celebrou este martes, 7 de outubro, no Pazo da Peregrina de Bertamiráns, o acto de presentación do seu recoñecemento oficial como Centro Comercial Aberto (CCA), un distintivo outorgado pola Xunta de Galicia que acredita a consolidación da entidade como referente do comercio de proximidade e da dinamización económica local.
O evento contou coa presenza do presidente da XEA, Ramón Cordido; do alcalde de Ames, Blas García; e do director xeral de Comercio e Consumo, Gabriel Alén Castro. Todos coincidiron en destacar a relevancia deste selo para o tecido empresarial amesán e o seu papel no impulso dun modelo comercial máis colaborativo, profesional e sostible.
Ramón Cordido subliñou que o recoñecemento “é o resultado do traballo conxunto de moitos empresarios e empresarias de Ames que cren nun comercio próximo e competitivo”. Engadiu que o obxectivo acadado “vén de lonxe e é froito da continuidade entre directivas: só unidos os pequenos nos volvemos grandes”.
Pola súa parte, o alcalde Blas García valorou o “papel fundamental de XEA na creación de comunidade arredor do pequeno comercio” e destacou que “os autónomos fan posible que Ames siga avanzando”. Tamén apelou á “política construtiva e ao diálogo como ferramentas para acadar acordos beneficiosos para a veciñanza”.
O director xeral Gabriel Alén agradeceu o esforzo da XEA e sinalou que a súa incorporación ao mapa galego dos máis de 50 Centros Comerciais Abertos é “unha mostra do compromiso co desenvolvemento económico local”. Ademais, anunciou que a Xunta fará “un foco especial na formación das xerencias dos centros”, ao consideralas “pezas esenciais para a boa xestión”.
Entre as iniciativas recentes impulsadas pola entidade, Alén destacou os Bonos Xeames, lanzados este mes de outubro para fomentar as compras no comercio local. Estes bonos permiten adquirir produtos cun desconto directo de 10 euros sobre un valor total de 50, e poderán empregarse ata o 31 de outubro nos establecementos asociados.
O selo de Centro Comercial Aberto permitirá á XEA acceder a novas liñas de apoio e subvencións autonómicas, centradas na dixitalización, mellora da imaxe urbana, promoción conxunta e formación para os negocios adheridos.
O acto concluíu cun momento lúdico con música en directo a cargo de Soundweaver e un pequeno ágape, simbolizando o espírito de colaboración e celebración que caracteriza á asociación empresarial amesá.
