O Concello de Santiago anunciou a posta en marcha da proposta ‘Nas sendas da Auga’, incluída no programa ‘Revelando Compostela’, que este mes de outubro permitirá coñecer como discorre a auga da cidade ata desembocar no mar. A actividade inclúe cinco roteiros guiados, catro a pé e un en bicicleta, con prazas limitadas.
As inscricións abriranse o luns 29 de setembro, e poderán realizarse de forma presencial na Casa das Asociacións de Cornes ou a través do teléfono 981 542 350. Cada percorrido contará cun máximo de 30 prazas.
O calendario de outubro arrinca o día 4, cunha andaina polo val da Grixoa, con saída desde o centro sociocultural da parroquia. O 9 de outubro será a quenda do coto do Son, cun itinerario que partirá do local sociocultural da Gracia.
A seguinte referencia será a ría de Arousa. O 18 de outubro programouse un percorrido polo monte de Godos e os mananciais da Ulla, con saída desde o local sociocultural de Bando; mentres que o 23 de outubro a proposta levará ás persoas participantes polos humidais dos Montes de Vite, partindo da Casa Agraria de Meixonfrío.
O ciclo completarase cun roteiro en bicicleta o 12 de outubro, que percorrerá os montes da cidade entre o local sociocultural de Aríns e a Casa Agraria.
Esta nova edición de ‘Revelando Compostela’ busca achegar a veciñanza ao patrimonio natural vinculado á auga, combinando divulgación e actividade física en diferentes contornas da capital galega.
