A Xunta de Goberno Local do Concello de Ames ten previsto aprobar este luns, 30 de decembro, o expediente de licitación das obras do centro multifuncional do Milladoiro, un proxecto considerado esencial para o municipio. O orzamento base de licitación ascende a 1.141.640,18 euros (IVE incluído) e inclúe traballos como urbanización do entorno, carpintería, illamento, cerramento, pintura, cimentación e revestimentos.
O alcalde de Ames, Blas García, subliñou a importancia deste proxecto: “▶️Esta obra é unha das pezas claves das infraestruturas do futuro para o Concello de Ames. Suporá un paso moi importante e poñerá fin á parálise que sofre o centro multifuncional do Milladoiro”. García destacou ademais que esta infraestrutura será fundamental para a formación e atención das persoas que precisan apoio municipal para atopar emprego.
A nova licitación chega despois de que o Concello resolvese o contrato coa anterior empresa adxudicataria, Citanias Obras y Servicios SLU, por incumprimentos contractuais. A resolución, avalada polo Consello Consultivo de Galicia, incluíu a imposición dunha prohibición para que esta empresa poida volver contratar coa administración local.
Con esta nova licitación, o Concello de Ames procura retomar o avance dun proxecto que busca consolidar o Milladoiro como un centro neurálxico para o desenvolvemento e apoio á cidadanía, cumprindo coa súa aposta por infraestruturas modernas e funcionais.
