O grupo municipal do BNG de Ames expresou a súa preocupación polos reiterados atrasos na entrega do novo CEIP do Milladoiro, proxecto incluído no Plan de Infraestruturas 2016-2020, pero que agora prevé a súa posta en funcionamento para o curso 2027/2028. A formación nacionalista critica que os prazos iniciais marcados para mediados de 2025 quedaran adiados unha vez máis e reclama á Xunta unha solución para garantir o acceso a un colexio adaptado ás necesidades do municipio.
Nun comunicado, o BNG lamentou que “a Xunta segue desatendendo as necesidades educativas de Ames e, en particular, do núcleo do Milladoiro, un dos máis dinámicos demograficamente de Galicia”. A formación subliña que este retraso prolongado impacta negativamente na comunidade educativa, especialmente nas familias e no alumnado.
Os nacionalistas instan á Xunta a garantir que a nova licitación do proxecto conte cun orzamento base axustado á realidade e suficiente para que o centro poida cumprir cos requisitos educativos da zona. Segundo o BNG, é imprescindible ofrecer unha infraestrutura que responda ao crecemento poboacional de Ames e que permita desconxestionar outros centros como o colexio de Ventín, que tamén reclama melloras desde o inicio do curso escolar.
A formación tamén apuntou que “as necesidades demandadas pola comunidade educativa levan demasiado tempo sen resposta” e que resulta urxente priorizar esta infraestrutura, especialmente nun municipio como Ames, que experimenta un crecemento continuo de poboación.
