O Concello de Brión deu a benvida ao Nadal na tarde-noite do pasado venres coa tradicional cerimonia de acendido das luces. O evento, celebrado no palco da música da localidade, reuniu a numerosos veciños e veciñas, especialmente familias, que gozaron dunha tarde festiva marcada pola actuación do mago Cayetano Lledó e a instalación dun vistoso alumeado navideño.
A xornada comezou coa actuación do mago Cayetano Lledó, quen durante máis dunha hora sorprendeu á rapazada e ás súas familias con trucos de maxia e humor. Tras este entretemento, arredor das sete da tarde, chegou o momento máis agardado: o acendido das luces de Nadal.
O alcalde de Brión, Pablo Lago, e a concelleira de Cultura, Sandy Sanmartín, subiron ao palco acompañados de Sabela, unha das nenas asistentes, encargada de premer o botón que iluminou o municipio. A elección de Sabela realizouse mediante un sorteo entre os números repartidos entre os cativos asistentes, un detalle que engadiu emoción ao acto.
O alumeado deste ano inclúe elementos emblemáticos que adornan diferentes espazos da vila. Entre eles, destaca un trineo iluminado situado diante da capela de Santa Minia, acompañado da palabra “Brión” e dunha árbore tamén alumeada. Preto da Casa da Cultura, instalouse unha gran bola de luces de Nadal, que captou a atención de moitos veciños para sacar fotografías. Ademais, as fachadas da biblioteca, a Casa da Cultura e o propio edificio do Concello contan con iluminación especial para estas festas.
A actividade concluíu co tradicional reparto gratuíto de chocolate con churros, que serviu para quentar aos asistentes nunha tarde-noite marcada polas baixas temperaturas. Moitas familias aproveitaron tamén para facer fotografías co novo alumeado, inmortalizando así o comezo do Nadal en Brión.
O evento, que combina tradición e participación veciñal, reafirma o compromiso do Concello con ofrecer actividades que unen á comunidade e celebran o espírito destas datas.
