O Concello de Brión celebrou unha recepción institucional para homenaxear ás dúas técnicas municipais que participaron no programa Especialistas en Cooperar no municipio de Tarrafal, en Cabo Verde, durante o mes de agosto. No acto estiveron presentes o alcalde de Brión, Pablo Lago, e o presidente do Fondo Galego de Cooperación e Solidariedade e rexedor de Nigrán, Juan González, quen valoraron o traballo realizado para fomentar un desenvolvemento económico local sustentable e participativo en Tarrafal.
Pablo Lago destacou que “os concellos de Brión e Nigrán somos socios fundadores do Fondo Galego de Cooperación e Solidariedade”, e subliñou a importancia da colaboración entre concellos “para impulsar un desenvolvemento económico sustentable e participativo”. Pola súa banda, Juan González apuntou que o Fondo Galego xa conta con 115 socios, incluíndo as catro deputacións galegas tras a recente incorporación da Deputación de Ourense, e valorou o labor das técnicas “Lola e Carla, que desenvolveron un traballo moi comprometido en Tarrafal, onde se lanzaron varias iniciativas en marcha”.
Durante a súa estadía en Tarrafal, Lola Landeira, axente de emprego e desenvolvemento local de Brión, e Carla Pérez, xefa de brigada de incendios de Nigrán, elaboraron un diagnóstico das necesidades e oportunidades do territorio en contacto directo coa poboación local. Este estudo inicial servirá de base para o desenvolvemento dun programa de cooperación a catro anos financiado pola Agencia Española de Cooperación Internacional al Desarrollo (AECID).
Landeira explicou que, para coñecer as necesidades locais, “percorrimos centos de quilómetros en coche e a pé, entrevistándonos con máis de sesenta persoas, desde representantes políticos ata a propia veciñanza, que coñece de primeira man as necesidades, especialmente no sector agrícola e ambiental, co enfoque de xénero”. Pérez destacou a “empatía da poboación polos problemas comúns, como a escaseza de auga, que se poderían solucionar con accións pequenas e que axudarían a fixar a poboación”.
AVALIACIÓN DO PROGRAMA E NOVOS PROXECTOS
O acto contou tamén coa presenza da concelleira de Servizos Sociais e Igualdade de Brión, Rosa Romero. Despois da recepción, as dúas técnicas participaron na xornada de avaliación do programa Especialistas en Cooperar, tirando conclusións para mellorar a iniciativa na súa próxima edición e propoñendo novas medidas de apoio para Tarrafal.
Esta iniciativa, apoiada polo Fondo Galego de Cooperación e Solidariedade, reafirma o compromiso de ambos concellos con proxectos de cooperación internacional e solidariedade, promovendo solucións que melloren as condicións de vida en comunidades que enfrontan retos específicos como a escaseza de recursos naturais e a necesidade de reter poboación no rural.
