A Fundación Empresa-Universidade Galega organiza unha xornada en Santiago de Compostela o próximo 29 de outubro para presentar os avances de tres proxectos innovadores no sector forestal e agroalimentario. As iniciativas, denominadas ‘Millopreciso‘, ‘Cogomelos+‘ e ‘Regavid‘, están orientadas a mellorar a xestión en agricultura de precisión, a produción micolóxica en piñeirais e a eficiencia nos sistemas de rega en viñedos.
A xornada incluirá unha exposición dos resultados acadados en cada proxecto ata a data, así como un relatorio sobre instrumentos e iniciativas públicas en innovación agraria, a cargo de Manuel López Luaces, xefe da área de Formación, Innovación e Investigación Agraria de Agacal.
AVANCES EN AGRICULTURA DE PRECISIÓN, PRODUCIÓN DE FUNGOS E OPTIMIZACIÓN DE RECURSOS HÍDRICOS
O proxecto ‘Millopreciso’, en marcha desde 2022, está liderado por Feuga en colaboración coa USC, Marcos Otero S.L. e Gandaría Ladrela. A iniciativa céntrase na incorporación de sensores en colleitadoras para medir en tempo real a produción e humidade do millo forraxeiro, permitindo xerar mapas de rendemento que facilitan un uso máis eficiente de sementes e fertilizantes e contribúen a reducir o impacto ambiental.
Pola súa banda, o proxecto ‘Cogomelos+’ busca aumentar a produtividade dos piñeirais galegos con tecnoloxías innovadoras que melloran tanto a produción de madeira coma a calidade e cantidade de fungos comestibles. Desenvolvido por Servitec Medio, a USC e Feuga, o estudo demostrou que os clareos nos piñeirais incrementan a produción de madeira cun valor estimado de 24.200 euros por hectárea para o piñeiro neozelandés e 19.500 euros para o galego. Ademais, preto do 80% das parcelas estudadas mostraron produtividade de especies como o Boletus pinophilus e o Hydnum repandum.
Esta xornada técnica ofrece unha oportunidade para coñecer o impacto e o potencial de innovación destas iniciativas no sector agroforestal de Galicia.
