O Festival Internacional de Monicreques Galicreques, organizado pola Asociación Cultural Barriga Verde coa colaboración do Concello de Santiago, da Xunta, da Deputación da Coruña, do Instituto Nacional de Artes Escénicas e Musicais (Inaem), de Iberescena e da Fundación SGAE, inicia este luns a súa programación de funcións ao que asistirán preto de 1.500 alumnos. En concreto, haberá 18 espectáculos que se poderán ver no Teatro Principal, na Carpa da Alameda, na Fundación SGAE e no Centro Sociocultural de Santa Marta.
Serán catro as funcións escolares previstas para este luns e tres delas comezarán ás 11:30 horas. O artista portugués Rui Sousa será o encargado de iniciar a xornada con ‘As marionetas tambén tém Coraçao’, mentres que a Fundación SGAE recibirá á compañía ecuatoriana Titiritainas para representar ‘Dentes de Leite e o CSC acollerá a Luís Vallecillo e a súa obra ‘Pupptes, Music&Blues. Ás 1:00 horas, o Teatro Principal ofrecerá ‘Emotivas’, unha montaxe dos galegos de Titiritres. Esta obra estrearase para o público xeral ás 18.00 horas no Teatro Principal.
Pola súa banda, ‘Emotivas’ é un espectáculo que a través de tres amigas (Melancolía, Irritación e Seguridade) descóbrese o que son as emocións, como fan sentir e a súa complexidade.
Tamén ás 18:00 horas, pero no CSC A Peregrina, Ocelot Teatro (O Salvador) ofrecerá a súa montaxe ‘O Home Machada‘, un espectáculo familiar que conciencia sobre a conservación dos bosques, a natureza e o medioambiente.
Para pechar a xornada, os arxentinos de Tres Tigres representarán ‘Desde o Altillo. Historia dun Exilio’ na Carpa da Alameda dentro do Cara Bé, programa específico de Galicreques para o público adulto. Neste caso, a obra trata a experiencia de vida da actriz, as peripecias que como nena tivo que vivir xunto a 25 membros da súa familia, abandonando o país de orixe para comezar un longo camiño cara ao asilo-exilio político en Cidade de México.
