Un home de 82 anos que desaparecera ao mediodía do sábado nunha urbanización de Teo foi atopado sen vida neste mesmo municipio durante o dispositivo de procura activado para localizalo.
O achado foi comunicado arredor das 04.30 horas da madrugada do domingo por unha patrulla da Garda Civil do Posto do Milladoiro, que localizou o home no interior dun vehículo. Segundo fontes da Garda Civil, o octoxenario padecía alzhéimer e os primeiros indicios apuntan a que puido desorientarse.
O operativo activouse durante a tarde do sábado, despois de que se presentase unha denuncia pola súa desaparición na urbanización Campos de Mirabel. Na procura participaron efectivos da Garda Civil, da Policía Local e persoas voluntarias. Máis tarde incorporáronse tamén os drons da Axencia Galega de Emerxencias (Axega).
Tras varias horas de rastrexo, as tarefas remataron inicialmente sen resultado, segundo explicou o 112 Galicia. Con todo, pasadas as 04.00 horas, o home foi atopado no interior dun coche estacionado na parroquia teense de Calo polas persoas que participaran na procura ao longo do día. Os servizos de emerxencias só puideron confirmar o seu falecemento.
