Un ciclista resultou ferido leve na noite deste martes tras sufrir unha caída na rúa de San Pedro de Mezonzo. O accidente produciuse arredor das 22:45 e obrigou á intervención da Policía Local e dunha ambulancia do 061.
Segundo a información recollida por Xornal de Compostela, a caída estivo provocada por unha fochanca existente na calzada. A roda da bicicleta quedou trabada no desnivel, rompeu e fixo que o ciclista saíse despedido por diante do vehículo antes de impactar contra o chan.
Como consecuencia do accidente, o home sufriu feridas na mandíbula e nos xeonllos, aínda que o seu estado foi cualificado como leve. O sinistro tamén causou danos materiais na bicicleta.
Ata o lugar desprazouse unha ambulancia do 061, cuxo persoal sanitario atendeu o ferido e posteriormente o trasladou ao Hospital Clínico, así como unha patrulla da Policía Local de Santiago.
